اب ریرا کو اگلے درجے پر لے جانے کا مناسب وقت ہے : توکھن ساہو

نئی دہلی، 29 اگست (یو این آئی) مرکزی حکومت میں رہائش و شہری امور کے مملکت وزیر توکھن ساہو نے جمعہ کے روز کہا کہ رئیل اسٹیٹ ریگولیٹری اتھارٹی (ریرا) نے اچھا کام کیا ہے اور اب وقت آ گیا ہے کہ اسے اگلے مرحلے پر لے جایا جائے ۔
مسٹر ساہو نے یہاں نریڈکو کے 17ویں قومی اجلاس سے ورچوئل طریقے سے خطاب کرتے ہوئے کہا کہ رئیل اسٹیٹ کے شعبے میں کاروبار کرنے میں آسانی کو مزید فروغ دینا ضروری ہے ۔ طریقۂ کار کو ڈیجیٹلائز کرنا اور سنگل ونڈو کلیئرنس جیسے اقدامات سرمایہ کاروں کو مزید اعتماد فراہم کریں گے اور ترقی کی رفتار کو تیز کریں گے ۔ انہوں نے تمام ریاستوں کو اس سمت میں ٹھوس اقدامات اٹھانے کا مشورہ دیا۔
مرکزی وزیر نے ریرا میں تبدیلیوں کا اشارہ دیتے ہوئے کہا کہ اتھارٹی نے کافی اچھا کام کیا ہے ، لیکن اب وقت آ گیا ہے کہ اسے ‘‘اگلے درجے ’’ پر پہنچایا جائے ۔ اس مقصد کے لیے انہوں نے رئیل اسٹیٹ شعبے سے تجاویز طلب کی ہیں۔
مسٹر ساہو نے رئیل اسٹیٹ کے شعبے میں ٹیکنالوجی اوراختراع پر زور دیتے ہوئے کہا کہ رئیل اسٹیٹ صرف اینٹوں اور سیمنٹ کا کام نہیں ہے ، بلکہ یہ زندگی کو سنوارنے ، خوابوں کو شکل دینے اور ملک کے مستقبل کی تعمیر کا عمل ہے ۔
انہوں نے پی ایم آواس یوجنا کی تعریف کرتے ہوئے کہا کہ اس نے لاکھوں خاندانوں کے اپنے گھر کے خواب کو پورا کیا ہے ۔