مویشی و ماہی پروری وسائل محکمہ نے سیلاب اور بارش کے دوران جانوروں کی حفاظت کیلئے مشورہ دیا

پٹنہ، 29 اگست (یواین آئی) بہار کے محکمہ مویشی و ماہی پروری وسائل نے سیلاب اور بارش کے دوران جانوروں کی حفاظت کے لیے مشورہ دیا ہے ۔
بارش اور سیلاب کے دوران جان و مال کے نقصان کا بہت زیادہ امکان رہتا ہے ۔ مویشی و ماہی پروری وسائل محکمے نے مویشی پروری سے وابستہ کسانوں کو اس سے ہونے والے نقصان سے بچانے کا مشورہ دیا ہے ۔ اس میں محکمہ نے کہا ہے کہ جانوروں کو سیلاب میں ڈوبی گھاس اور پہلے کا بھیگا ہوابھوسا نہ کھلائیں۔
محکمہ نے جاری کردہ ایڈوائس میں کہا ہے کہ سیلاب کی صورت میں جانوروں کو اونچی جگہ پر رکھنے کا انتظام کیا جائے جہاں پانی کی نکاسی کا مناسب نظام موجود ہو تاکہ جانوروں کا احاطہ صاف اور خشک رہے اور جانوروں کو گرمی اور نمی سے ہونے والی بیماریوں سے بچایا جا سکے ۔ جانوروں کے شیڈ کو صاف ستھرا اور صحت بخش رکھنے کے لیے وقتاً فوقتاً کیڑے مار ادویات کا استعمال کیا جانا چاہیے ۔ جانوروں کے گھر کو زیادہ نمی سے بچانے کے لیے جانوروں کے شیڈ میں چونے کا چھڑکاو[؟][؟] کیا جائے ۔
اس کے علاوہ جانوروں کو متوازن خوراک اور صاف اور میٹھا پانی فراہم کیا جائے ۔ اس وقت اندرونی اور بیرونی طفیلیوں کا پھیلاو کافی زیادہ ہے ۔ ان کو روکنے کے لیے تمام جانوروں میں کیڑے مار دوا کا استعمال ضروری ہے ۔ سیلاب کے دوران مردہ جانوروں سے کئی قسم کی بیماریاں پھیلنے کا خدشہ ہوتا ہے اس لیے مردہ جانوروں کو احتیاط سے ٹھکانے لگائیں۔ بیمار اور زخمی جانوروں کو صحت مند جانوروں سے الگ رکھنا چاہیے اور علاج کے لیے جانوروں کے ڈاکٹر سے رابطہ قائم کرنا چاہیے ۔
محکمہ نے بارش کے دوران جانوروں کی حفاظت پر خصوصی توجہ دینے کو کہا ہے ۔ بارش کے موسم میں مویشیوں کے شیڈ کی کھڑکیاں کھلی رکھنے اور گرمی اور اومس سے بچنے کے لیے پنکھے استعمال کرنے کا مشورہ دیا گیا ہے ۔ مویشی کے شیڈ میں جانوروں کے فضلے کو ٹھکانے لگانے کا بھی مناسب انتظام کریں۔ بارش کے دوران جانوروں کو باہر نہ لے جائیں۔ پانی کو ایک جگہ جمع نہ ہونے دیں، تاکہ مچھروں کی افزائش نہ ہو اورطفیلیوںکے انفیکشن سے بچا جا سکے ۔ مویشی پالنے والے کسان محکمہ کی طرف سے جاری کردہ مشوروں پر عمل کرکے جانوروں کے وسائل کے نقصان سے بچ سکتے ہیں۔