پیرس، 29 اگست (یو این آئی) ساتوک سائراج رینکی ریڈی اور چراغ شیٹی نے چھٹی سیڈ چینی لیانگ وی کینگ اور وانگ چانگ کو شکست دے کر پیرس میں جاری بی ڈبلیو ایف ورلڈ چیمپئن شپ 2025 کے کوارٹر فائنل میں داخلہ حاصل کرلیا۔
راؤنڈ آف 16 میں چینی جوڑی کا سامنا کرتے ہوئے، ساتوک-چراغ جمعرات کو ابتدائی گیم 19-21 سے معمولی فرق سے ہار گئے، لیکن انہوں نے شاندار واپسی کرتے ہوئے دوسرے گیم پر 21-15 سے غلبہ حاصل کرلیا۔ فیصلہ کن کھیل کافی دلچسپ رہا، اسکور کئی بار برابر رہا، لیکن ساتوک-چراغ نے ایک گھنٹے 6 منٹ میں 21-17 سے جیت حاصل کرکے کوارٹر فائنل میں اپنی جگہ یقنی کرلی۔
اب ہندوستانی جوڑی کا مقابلہ سیکنڈ سیڈ ملائیشیا کے ایرون چیا اور سوہ ووئی یک سے ہوگا، جو اپنی جیت کے سلسلے کو جاری رکھنے کے خواہاں ہوں گے۔
اس سے قبل خواتین کے سنگلز میں دو بار کی اولمپک تمغہ یافتہ پی وی سندھو اور مکسڈ ڈبلز میں دھرو کپیلا اور تنیشا کرسٹو نے کوارٹر فائنل میں اپنی جگہ یقینی کر لی ہے۔
سندھو نے عالمی نمبر دو چین کی وانگ ژی کو شکست دے کر کوارٹر فائنل میں داخلہ حاصل کیا۔ 2019 کی عالمی چیمپئن سندھو نے پہلے گیم میں جیت کے ساتھ اپنی گرفت مضبوط کر لی اور پھر دوسرے گیم میں اپنے حریف کو مکمل طور پر مات دے کر صرف 48 منٹ میں 21-19، 21-15 سے کامیابی حاصل کی۔
سیمی فائنل میں جگہ بنانے کے لیے جمعہ کو سندھو کا مقابلہ انڈونیشیا کی شٹلر پوتری کوسوما وردانی سے ہوگا۔
دھرو کپیلا اور تنیشا کرسٹو نے پانچویں سیڈ ہانگ کانگ کے چین کے تانگ چون مین اور تسے ینگ سویٹ کو ایک گھنٹہ 3 منٹ تک جاری رہنے والے سخت مقابلے میں 19-21، 21-12، 21-15 سے شکست دی۔ اب ان کا مقابلہ کوارٹر فائنل میں ملائیشیا کی چوتھی سیڈ چن تانگ جی اور ٹوہ ای وی کی جوڑی سے ہوگا۔یو این آئی۔ این یو۔
