جمشید پور کی ٹیم سیمی فائنل میں جگہ بنانے کے لئے ڈائمنڈ ہاربر سے مقابلہ کرے گی

جمشید پور، 16 اگست (یواین آئی) جمشید پور ایف سی 134ویں انڈین آئل ڈیورنڈ کپ کے تیسرے کوارٹر فائنل میں پہلی مرتبہ پہنچنے والی والی ڈائمنڈ ہاربر ایف سی سے مقابلہ کرے گی۔ یہ میچ جے آر ڈی ٹاٹا اسپورٹس کمپلیکس میں شام 4 بجے شروع ہوگا۔ جمشید پور ایف سی نے گروپ سی کے فاتح کے طور پر کوارٹر فائنل کے لئے کوالیفائی کیا، جبکہ ڈائمنڈ ہاربر ایف سی بہترین دوسرے نمبر پر رہنے والی ٹیموں میں سے ایک کے طور پر آگے بڑھی ہے۔
خالد جمیل کے قومی ٹیم میں شامل ہونے کے بعد عبوری ہیڈ کوچ اسٹیون ڈائس کی قیادت میں جمشیدپور نہ صرف حکمتِ عملی میں تیز ہے بلکہ بے حد پُرعزم بھی ہے۔ ڈائس نے اس ہموار تبدیلی کی تعریف کی اور ٹیم کی رفتار کو بڑھانے میں گھریلو شائقین کا شکریہ ادا کیا۔
کوچ ڈائس نے ٹیم کے رویے کے بارے میں واضح کہا: ’’کل ہمارا مقابلہ پہلی بار ڈائمنڈ ہاربر ایف سی سے ہوگا اور ہم جانتے ہیں کہ وہ ایک مضبوط ٹیم ہے، جو پچھلے 23 میچوں سے ناقابلِ شکست ہے۔ ہمیں محتاط اور مرکوز رہنا ہوگا۔ میرے کھلاڑی تیار ہیں۔ ہم نے اچھی تربیت کی ہے اور اس چیلنج کے لئے پُرعزم ہیں۔ اپنے گھریلو میدان پر کھیلنا ہمیشہ خاص ہوتا ہے اور میں اپنے تمام شائقین سے درخواست کرتا ہوں کہ آئیں اور ہمارا ساتھ دیں۔ ہم اس میچ کو جیتنے اور اگلے مرحلے میں اپنی جگہ پکی کرنے کے لئے میدان پر اپنی پوری طاقت لگا دیں گے۔‘‘
جمشیدپور نے گروپ مرحلے میں ترِبھون آرمی ایف سی کو 3-2، انڈین آرمی فٹ بال ٹیم کو 1-0 اور لداخ ایف سی کو 2-0 سے شکست دے کر شاندار کارکردگی دکھائی۔ وہیں ڈائمنڈ ہاربر ایف سی نے گروپ مرحلے میں کولکاتہ کی مشہور ٹیم محمڈن ایس سی کو 2-1 سے ہرا کر شروعات کی، پھر بارڈر سکیورٹی فورس کو 8-1 سے ہرایا لیکن موہن بگان سپر جائنٹ سے 1-5 سے ہار کا سامنا کیا۔ آخرکار +4 گول کے فرق نے ہی ابھرتی ہوئی ٹیم کو ناک آؤٹ مرحلے میں جگہ دلائی۔
ڈائمنڈ ہاربر کی ٹیم نے اس سیزن میں ایک نیا معیار قائم کیا ہے اور ڈورنڈ کپ میں مختلف مقابلوں میں لگاتار 23 میچوں تک ناقابلِ شکست رہنے کے ریکارڈ کے ساتھ پہنچی ہے۔
ان کے ہیڈ کوچ کیبو وِکونا نے میچ سے پہلے پُراعتماد انداز میں کہا: ’’ہمیں اپنے پچھلے میچ میں مطلوبہ نتیجہ نہیں ملا، لیکن یہ فٹبال کا حصہ ہے۔ ضروری یہ ہے کہ ہم اپنی غلطیوں سے سیکھیں، توجہ مرکوز رکھیں اور اگلے میچ پر اپنا پورا دھیان دیں۔ ہم جانتے ہیں کہ جے ایف سی کے خلاف یہ ایک مشکل چیلنج ہوگا، جو ایک آئی ایس ایل ٹیم ہے جس میں بہترین کھلاڑی ہیں۔ تاہم ہم پُرعزم ہیں کہ کوارٹر فائنل میں اپنا سفر ختم نہیں ہونے دیں گے۔ لڑکوں نے سخت محنت کی ہے، اچھی تیاری کی ہے اور ہم کل مطلوبہ نتیجہ حاصل کرنے کے لئے اپنی پوری کوشش کریں گے۔‘‘
ڈائمنڈ ہاربر کے ابتدائی اسٹرائیکر کلیٹن سلوا کے زخمی ہونے کی وجہ سے اس اہم میچ میں کھیلنے پر شبہ ہے، لیکن اُن کے پاس تجربہ کار لوکا ماجسین کی شکل میں ایک قابل اعتماد متبادل موجود ہے، جنہوں نے ٹورنامنٹ میں پہلے ہی چار گول اسکور کیے ہیں اور اُنہیں جوبی جسٹن اور گِرِک خوسلا کی اچھی شراکت ملے گی۔ اس کے علاوہ اُن کے پاس تجربہ کار ہالی چرن نارزاری اور نارو ہری شریستا جیسے کھلاڑی بھی ہیں جنہیں ضرورت پڑنے پر میدان میں اتارا جا سکتا ہے۔ ہسپانوی کھلاڑی میکل کورٹازار اور میلرائے اسیسی کی قیادت میں دفاعی لائن جمشیدپور کے خلاف چیلنج کے لیے تیار ہے اور گھریلو ٹیم کے جارحانہ حملوں سے بخوبی واقف ہے۔