پیوٹن نے مسلح افواج کے یونیفارم سے متعلق اہم حکم نامہ جاری کر دیا

روسی صدر ولادیمیر پیوٹن نے مسلح افواج کے بیرون ملک تیار کردہ یونیفارم سے متعلق اہم حکم نامہ جاری کر دیا۔
اے پی پی کی رپورٹ کے مطابق پیوٹن نے ایک حکم نامے پر دستخط کیے جس کے تحت یکم جنوری 2026 سے ملک کی مسلح افواج کیلیے غیر ملکی تیار کردہ یونیفارم اور متعلقہ سامان کی خریداری پر پابندی عائد کر دی گئی۔
حکم نامے میں کہا گیا کہ یکم جنوری 2026 سے روسی مسلح افواج کے تمام یونیفارم اور دیگر ملبوسات صرف اُن روسی کمپنیوں سے حاصل کیے جائیں گے جن کی پیداواری تنصیبات روس کے اندر واقع ہیں۔
2027 تک یہ شرط کپڑوں اور ہاتھ سے بنے ہوئے دیگر مواد پر بھی لاگو ہوگی، یعنی ان اشیاء کو بھی مکمل طور پر روس میں تیار کیا جانا لازم ہوگا۔
حکم نامے میں کہا گیا کہ اس اقدام کا مقصد فوجی ضروریات کیلیے غیر ملکی ساختہ ملبوسات اور مواد کی خریداری کو مکمل طور پر ختم کرنا ہے۔فوجی لباس اور سازو سامان میں یونیفارم، بیجز ، بستر، خصوصی ملبوسات، جوتے، آلات و دیگر سامان اور حفظان صحت کی اشیا شامل ہیں جن کی خریداری روسی ریاستی دفاعی آرڈر کے نظام کے تحت کی جاتی ہے