گل ہندوستان کی ٹیسٹ ٹیم کو نئی بلندیوں تک لے جائیں گے: کے ایل راہل

لندن// ہندوستان ٹیم کے سرکردہ بلے باز کے ایل راہل نے کپتان شبھمن گل کی تعریف کرتے ہوئے کہا ہے کہ شبھمن واقعی شاندار رہے ہیں۔
انہوں نے کہا:”انہوں نے واقعی آگے بڑھ کر قیادت کی ہے، کھلاڑیوں کے ساتھ سخت محنت کی ہے۔ وہ حکمت عملی کے لحاظ سے بھی بہت عمدہ ثابت ہوئے ہیں۔ انہوں نے جو بھی تبدیلیاں کیں، ان سے ہمیشہ ہمیں کسی نہ کسی طرح وکٹیں ملی ہیں۔ وہ مزید نکھریں گے، ایک لیڈرکے طور پر اپنی جگہ مضبوط کریں گے، اور اس ہندوستانی ٹیسٹ ٹیم کو نئی بلندیوں پر لے جائیں گے۔”
ٹیسٹ کرکٹ اور سیریز کے ڈرا پر براڈکاسٹر سے گفتگو کرتے ہوئے راہل نے کہا:”ٹیسٹ کرکٹ میرے لیے بہت اہمیت رکھتی ہے۔ میں کافی عرصے سے کرکٹ کھیل رہا ہوں۔ ہم نے چیمپئنز ٹرافی جیتی، میں نے ہندوستان کو ورلڈ کپ جیتتے دیکھا۔ ورلڈ کپ جیتنے سے بڑی کوئی چیز نہیں، لیکن ٹیسٹ کرکٹ رہے گی یا نہیں، اس پر کئی شبہات اور سوالات رہے ہیں۔”
"مجھے لگتا ہے کہ جس انداز میں ہم نے یہ سیریز کھیلی، اس نے دونوں ٹیموں کی جانب سے ان سوالات کا جواب دے دیا ہے۔”
انہوں نے مزید کہا:”ہمارے لیے، ایک ایسی ٹیم کے طور پر جسے اس سیریز میں کمزور سمجھا جا رہا تھا، ہر میچ میں واپسی کرنا اور 2-2 کا نتیجہ حاصل کرنا… یہ شاید ظاہری طور پر ایک ڈرا لگے، لیکن ہمارے لیے اور ہندوستانی ٹیسٹ کرکٹ کے مستقبل کے لیے یہ ایک بہت بڑی کامیابی ہے۔ یہیں سے ایک نئے دور کی شروعات ہو گی، اور ہندوستان غیر ملکی دوروں پر مزید سیریز جیتے گا۔ پوری ٹیم اس کی مستحق ہے۔”
ٹیم میں سینئر کے طور پر اپنے کردار پر راہل نے کہا:”جیسے ہی میں ٹیم میں شامل ہوا، مجھے سینئر کھلاڑیوں کی غیر موجودگی کا احساس ہوا۔ اردگرد دیکھنا اور روہت، وراٹ ، اور اشون کو نہ دیکھنا عجیب سا لگا۔ ہر کوئی میرے پاس آیا اور مجھ سے صورتحال کے بارے میں پوچھنے لگا۔ تب مجھے احساس ہوا کہ میں اب ایک مختلف کردار میں آ گیا ہوں، جہاں نوجوان کھلاڑیوں کی مدد کرنا اور اپنا سارا تجربہ ان کے لیے استعمال کرنا میری ذمہ داری ہے، اور میں اس ٹیم کے لیے پوری طرح تیار ہوں۔”