آسٹریلیا نے ویسٹ انڈیز کو آٹھ وکٹوں سے شکست دی

کنگسٹن//ایڈم زامپا کی شاندار گیندبازی (تین وکٹیں) کے بعد جاش انگلش (ناٹ آؤٹ 78) اور کیمرون گرین (56) کی طوفانی نصف سنچری کی بدولت آسٹریلیا نے بدھ کو دوسرے ٹی-20 مقابلے میں ویسٹ انڈیز کو 28 گیندیں باقی رہتے ہوئے 8وکٹ سے شکست دی۔ اس جیت کے ساتھ ہی آسٹریلیا نے پانچ میچوں کی سیریز میں 0-2 کی برتری حاصل کر لی ہے ۔
173 رنز کے ہدف کا تعاقب کرنے اتری آسٹریلوی ٹیم کی شروعات اچھی نہیں رہی اور اس نے دوسرے ہی اوور میں صرف 13 رنز پر گلین میکسویل (12) کی شکل میں اپنا پہلا وکٹ گنوا دیا تھا۔ دوسرا جھٹکا آسٹریلیا کو 42 کے اسکور پر کپتان مچل مارش (21) کے آؤٹ ہونے سے لگا لیکن اس کے بعد جاش انگلش اور کیمرون گرین نے اننگز کوبخوبی سنبھالا ۔ دونوں کے درمیان تیسرے وکٹ کے لیے 131 رنز کی ناقابل شکست شراکت ہوئی۔ آسٹریلیا نے 15.2 اوور میں دو وکٹوں کے نقصان پر 173 رنز بنا کر میچ آٹھ وکٹوں سے جیت لیا۔
جاش انگلش نے 33 گیندوں پر پانچ چھکوں اور سات چوکوں کی مدد سے 78 رنز بنائے ، جبکہ کیمرون گرین نے 32 گیندوں پر چار چھکے اور تین چوکے لگاتے ہوئے ناٹ آؤٹ 56 رنز کی اننگز کھیلی۔ ویسٹ انڈیز کی طرف سے جیسن ہولڈر اور الزاری جوزف نے ایک ایک وکٹ حاصل کی۔
اس سے قبل آسٹریلیا نے ٹاس جیت کر پہلے گیندبازی کرنے کا فیصلہ کیا۔ ویسٹ انڈیز کی جانب سے بیٹنگ کی شروعات برینڈن کنگ اور کپتان شائی ہوپ کی اوپننگ جوڑی نے کی، جنہوں نے پہلے وکٹ کے لیے 63 رنز جوڑے ۔ برینڈن کنگ نے 36 گیندوں میں تین چوکوں اور چار چھکوں کی مدد سے 51 رنز کی اننگز کھیلی، جبکہ کپتان ہوپ 13 گیندوں پر 9 رنز بنا کر آؤٹ ہوئے ۔ اس کے بعد مڈل آرڈر بلے باز آسٹریلوی بولنگ کے آگے زیادہ دیر نہ ٹھہر سکے اور یکے بعد دیگرے وکٹ گنواتے چلے گئے ۔ تاہم ویسٹ انڈیز کے بلے بازوں نے جارحانہ کھیل کا بھی مظاہرہ کیا۔ شمرون ہیٹمائر نے 10 گیندوں پر 14 رنز، روسٹن چیز نے 16 گیندوں پر 16 رنز، روومن پاول نے 14 گیندوں پر 12 رنز بنائے ، جبکہ شیرفین ردرفورڈ بغیر کوئی رن بنائے پویلین لوٹ گئے ۔
اپنا آخری بین الاقوامی میچ کھیلنے رہے آندرے رسل نے 15 گیندوں پر دو چوکوں اور چار چھکوں کی مدد سے 36 رنز بنائے ۔ ہولڈر صرف ایک رن بنا کر آؤٹ ہوئے ۔ آخر میں گڈاکیش موتی نے 9 گیندوں پر ایک چوکے اور دو چھکوں کی مدد سے ناٹ آؤٹ 18 رنز بنائے ۔
آسٹریلیا کی جانب سے ایڈم زامپا نے تین وکٹیں حاصل کیں، ناتھن ایلس اور میکسویل کو دو، دو وکٹیں ملیں، جبکہ بین ڈوارشئیس نے ایک کھلاڑی کو آؤٹ کیا۔
یو این آئی ۔ م ع۔ایف اے