سی بی آئی نے سائبر انویسٹمنٹ فراڈ کیس میں دس مقامات پر تلاشی مہم چلائی

نئی دہلی// سینٹرل بیورو آف انویسٹی گیشن (سی بی آئی) نے سائبر مالیاتی جرائم پر آپریشن چکر-5 کے تحت جاری ملک گیر کارروائیوں کے دوران سائبر منظم سرمایہ کاری دھوکہ دہی سے متعلق ایک کیس میں جمعہ کو دہلی، حصار، لکھنؤ، ممبئی، پونے اور ناسک میں 10 مقامات پر وسیع پیمانے پر تلاشی مہم چلائی اور ایک شخص کو گرفتار کیا۔
سی بی آئی نے جمعہ کو بتایا کہ یہ گرفتاری ممبئی کے کلیان میں کی گئی۔ یہ ملزم سائبر مجرمانہ نیٹ ورک کو پہلے سے فعال سِم کارڈز اور ‘میول بینک اکاؤنٹس’ کی فراہمی میں فعال طور پر ملوث تھا۔ تلاشی کے دوران اس کے قبضے سے کافی مقدار میں قابل اعتراض مواد برآمد ہوا۔
سی بی آئی کے مطابق، یہ کیس ایک منظم دھوکہ دہی سے متعلق ہے ، جس میں جعلی موبائل ایپلی کیشنز اور واٹس ایپ گروپس کے ذریعے نا واقف افراد کو دھوکہ دیا گیا۔ مجرموں نے معروف لسٹڈ کمپنیوں کے شیئرز رعایتی نرخوں پر دینے کا وعدہ کرکے معصوم سرمایہ کاروں کو دھوکے سے راغب کیا۔ متاثرین کی جانب سے اپنی محنت کی کمائی سرمایہ کاری کرنے کے بعد، ملزمان نے مذکورہ رقم کا غلط استعمال کیا، جس سے لوگوں کو کافی نقصان ہوا۔
تلاشی کے دوران سی بی آئی نے ملزم افراد کے احاطوں سے قابل اعتراض ڈیجیٹل اور دستاویزی ثبوت ضبط کیے ، جن سے معصوم سرمایہ کاروں کو دھوکہ دینے کے لیے استعمال ہونے والے پیچیدہ طریقہ کار کا پردہ فاش ہوا ہے ۔