وزیر اعظم عالمی یوم ماحولیات کے موقع پر برگد کا درخت لگائیں گے

نئی دہلی// وزیر اعظم نریندر مودی عالمی یوم ماحولیات کے موقع پر شجرکاری مہم کے ایک حصہ کے طور پر جمعرات کو یہاں برگد کا درخت لگائیں گے ۔
وزیر اعظم یہاں بھگوان مہاویر ونستھلی پارک میں درخت لگانے کی خصوصی پہل کے حصے کے طور پر ایک درخت لگائیں گے ۔ مسٹر مودی ‘ایک پیڑ ماں کے نام پہل کے تحت برگد کا درخت لگائیں گے ۔ یہ ‘اراؤلی گرین وال پروجیکٹ کا حصہ ہوگا، جس کا مقصد 700 کلومیٹر طویل اراولی رینج میں دوبارہ جنگلات لگانا ہے ۔
یہ پروجیکٹ دہلی، راجستھان، ہریانہ اور گجرات سمیت چار ریاستوں کے 29 اضلاع میں اراؤلی پہاڑی سلسلے کے ارد گرد پانچ کلومیٹر کے بفر زون میں گرین کور کو پھیلانے کی ایک بڑی پہل ہے ۔ اس کا مقصد جنگلات، جنگلات کی بحالی اور آبی ذخائر کی بحالی کے ذریعے اراؤلی کی حیاتیاتی تنوع کو فروغ دینا ہے ۔ اس کا مقصد زمین کی زرخیزی، پانی کی دستیابی اور علاقے کی آب و ہوا کی موافقت کو بھی بہتر بنانا ہے ۔ اس منصوبے سے مقامی کمیونٹیز کو روزگار اور آمدنی پیدا کرنے کے مواقع بھی ملیں گے ۔
اس کے علاوہ مسٹر مودی دہلی حکومت کے پائیدار ٹرانسپورٹ اقدام کے تحت 200 الیکٹرک بسوں کو بھی جھنڈی دکھائیں گے ۔ اس سے نہ صرف صاف شہری نقل و حرکت کو فروغ ملے گا بلکہ ماحولیاتی توازن کے حوالے سے ملک کی اجتماعی ذمہ داری کی بھی علامت ہوگی۔