آئی پی ایل کوالیفائر ٹو میں سلو اوور ریٹ کے لیے ایر، ہاردک پر جرمانہ عائد

احمد آباد//) انڈین پریمیئر لیگ (آئی پی ایل) 2025 کے دوسرے کوالیفائر میچ میں سلو اوور ریٹ پر پنجاب کنگز کے کپتان شریاس ایر اور ممبئی انڈینز کے کپتان ہاردک پانڈیا پر جرمانہ عائد کیا گیا ہے۔
اتوار کی رات احمد آباد میں کھیلا گیا آئی پی ایل 2025 کوالیفائر 2 میچ بارش کی وجہ سے دو گھنٹے بعد شروع ہوا تھا۔ دونوں ٹیموں کے سلو اوور ریٹ کی وجہ سے میچ مزید تاخیر سے ختم ہوا۔
اس سیزن میں، پنجاب کنگز نے دوسری بار سلو اوور ریٹ کی غلطی کا ارتکاب کیا، اس لیے اس کے کپتان شریاس ائیر پر 24 لاکھ روپے جرمانہ عائد کیا گیا۔ ممبئی انڈینز کی جانب سے اس طرح کی تیسری غلطی ہونے پر ہاردک پانڈیا پر 30 لاکھ روپے جرمانہ عائد کیا گیا، حالانکہ پنجاب کنگز کے باقی کھلاڑیوں پر چھ لاکھ روپے یا ان کی میچ فیس کا 25 فیصد، جو بھی کم ہو، جرمانہ عائد کیا گیا ۔ دوسری طرف یہ رقم ممبئی کے کھلاڑیوں پر 12 لاکھ روپے یا 50 فیصد رہی۔
خیال رہے کہ سلو اوور ریٹ کی یہ ممبئی انڈینز کی تیسری غلطی تھی، اس کے باوجود ہاردک کو معطلی کا سامنا نہیں کرنا پڑا جیسا انہیں آئی پی ایل 2024 میں سامنا کرنا پڑا تھا، جس کی وجہ سے وہ نئے قوانین کے نافذ ہونے سے پہلے آئی پی ایل 2025 کا پہلا میچ نہیں کھیل سکے تھے۔