پولیس نے سرینگر میں ۵ رہائشی مکان مقفل کئے

سرینگر/۲۱جون
پولیس نے سرینگر میں منگل کے روز مبینہ طور پر جنگجویانہ سرگرمیوں کیلئے استعمال ہونے کی پادائش میں پانچ رہائشی مکانوں کو منسلک کردیا ہے۔
پولیس کا کہنا ہے کہ مزید کئی رہائشی مکانوں کی نشاندہی کی گئی ہے اور اْنہیں بھی بہت جلد اٹیچ کیا جائے گا۔
پولیس کے ایک ترجمان نے بتایا کہ ضلع سرینگر میں جنگجویانہ سرگرمیوں کیلئے استعمال میں لائے گئے پانچ رہائشی مکانوں کو منسلک کر دیا گیا ہے۔انہوں نے بتایا کہ یہ وہ گھر ہیں جہاں یہ بات بلا شبہ ثابت ہو چکی ہے کہ یہ مکانات ملی ٹینسی کے مقصد کے لئے استعمال کئے گئے تھے اور مذکورہ مکانوں میں رہا ئش پذیر مکینوں نے ہی جان بوجھ کر ملی ٹینٹوں کو پناہ دی تھی۔
ترجمان کے مطابق مذکورہ رہائشی مکانوں میں ہی عام شہریوں اور سیکورٹی فورسز پر حملوں کی منصوبہ بندی کی گئی تھی اور ان مکانوں کو بطور ہائیڈ آوٹ استعمال میں لایا جاتا تھا۔
پولیس ترجمان کے مطابق پارمپورہ پولیس اسٹیشن میں درج ایف آئی آر زیر نمبر۲۵۷/۲۰۲۰ کے تحت دو مکان منسلک کئے گئے۔اسی طرح پانتھ چوک پولیس تھانے میں درج مقدمہ زیر نمبر۱۳۲/۲۰۲۱‘نوہٹہ پولیس تھانے میں درج ایف آئی آر زیر نمبر۳۵/۲۰۲۱‘زکورہ تھانے میں درج ایف آئی آر زیر نمبر۲/۲۰۲۲کے تحت پانچ مکانات فی الحال منسلک کئے گئے ہیں۔
پولیس کا کہنا ہے کہ ضلع بھر میں کئی اور مکانوں کی نشاندہی کی گئی ہے جنہیں جنگجو ہائیڈ آوٹ کے بطور استعمال میں لا رہے تھے۔
پولیس نے عوام الناس سے ایک دفعہ پھر اپیل کی ہے کہ وہ ملی ٹینٹوں کوپناہ دینے سے گریز کریں۔ اگر ایسا نہیں کیا گیا تو اس صورت میں قانون کے مطابق مکانات کو اٹیچ کرنے کی کارروائی کیلئے مجبور ہوں گے۔
ترجمان نے مزید بتایا کہ رہائشی مکانوں میں ملی ٹینٹوں کی جانب سے زبردستی داخل ہونے کی صورت میں معاملے کو فوری طورپر پولیس کی نوٹس میں لایا جائے ۔