کشمیر میں جنگجویانہ سرگرمیاں کم:راج ناتھ

سرینگر//
وزیر دفاع راج ناتھ سنگھ نے جمعرات کو کہا کہ جموں و کشمیر میں عسکریت پسندوں کی سرگرمیوں میں نمایاں کمی آئی ہے۔
جمعرات کو جاری کردہ ایک سرکاری بیان میں کہا گیا ہے’’وزیر دفاع، راج ناتھ سنگھ، جو مرکزی زیر انتظام علاقے کے دو روزہ دورے پر ہیں‘ نے کہا کہ حال ہی میں جموں و کشمیر میں عسکریت پسندوں کی سرگرمیوں کی تعداد میں کمی آئی ہے‘‘۔
اپنی آمد کے فوراً بعد سنگھ نے جموں کشمیر کے اگلے علاقوں کا دورہ کیا اور سرحد پر سیکورٹی صورتحال کا جائزہ لیا۔
آرمی چیف جنرل منوج پانڈے، جنرل آفیسر کمانڈنگ ان چیف ‘شمالی کمان کے لیفٹیننٹ جنرل اپیندر دویدی، جی او سی۱۵ کور لیفٹیننٹ جنرل اے ایس اوجلا اور جی او سی۱۹ انفنٹری ڈویڑن میجر جنرل اجے چاندپوریا ان کے ہمراہ تھے۔ انہیں مسلح افواج کی آپریشنل تیاریوں سے آگاہ کیا۔بیان کے مطابق ’’بعد میں، راج ناتھ سنگھ نے مسلح افواج، بارڈر سیکورٹی فورس (بی ایس ایف)‘ سینٹرل ریزرو پولیس فورس (سی آر پی ایف) اور جموں و کشمیر پولیس کے اہلکاروں سے بات چیت کی۔
بیان میں کہا گیاکہ اہلکاروں سے خطاب کرتے ہوئے، انہوں نے مشکل حالات میں بھی اپنی ذمہ داریوں کو احسن طریقے سے نبھانے پر ان کی تعریف کی، اور ان کی بہادری اور جوش کو قابل ذکر قرار دیا۔انہوں نے سیکورٹی اہلکاروں کی بے مثال ہمت اور لگن کے ساتھ ملک کی خدمت کرنے اور لوگوں خصوصاً نوجوانوں میں قومی فخر کا جذبہ پیدا کرنے پر ان کی تعریف کی۔
وزیر دفاع کاکہنا تھا’’ہمارے پڑوسی نے ہمیشہ بھارت مخالف سرگرمیوں کا سہارا لیا ہے۔ ریاست نے ماضی میں بھی دہشت گردی کی کارروائیوں کا مشاہدہ کیا ہے۔ مسلح افواج، بی ایس ایف، سی آر پی ایف اور جموں و کشمیر پولیس کے اہلکاروں کی انتھک کوششوں کی وجہ سے، حال ہی میں ریاست میں عسکریت پسندانہ سرگرمیوں کی تعداد میں نمایاں کمی آئی ہے‘‘۔
سنگھ کاکہنا تھا’’پاکستان ایک ہزارزخموں کے ساتھ ہندوستان کا خون بہانے کے اپنے انداز سے ملک میں امن کو خراب کرنے کی مسلسل کوشش کرتا ہے۔ لیکن، ہماری سیکورٹی فورسز اس ملک کے لیے ایسی حفاظتی ڈھال ہیں کہ جو بھی اسے توڑنے کی کوشش کرتا ہے، اپنا خون بہاتا ہے۔ قوم کا ہماری افواج پر بے پناہ اعتماد ہے جو کسی بھی صورتحال سے نمٹنے کیلئے ہمہ وقت تیار رہتی ہے‘‘۔
وزیر دفاع نے کہا کہ ہندوستان ایک امن پسند ملک ہے جس نے دنیا کو ’وسودھائیو کٹمبکم‘ (پوری دنیا ایک خاندان ہے) کا پیغام دیا ہے۔ان کاکہنا تھا’’ہم نے کبھی کسی ملک کو کسی بھی طرح سے نقصان پہنچانے کی کوشش نہیں کی اور نہ ہی کسی کی ایک انچ زمین پر قبضہ کرنے کی کوشش کی۔‘‘تاہم انہوں نے کہا کہ اگر کبھی قوم کے اتحاد اور سالمیت کو ٹھیس پہنچانے کی کوشش کی گئی تو مسلح افواج منہ توڑ جواب دیں گی۔
سنگھ نے اس یقین کا اظہار کیا کہ مسلح افواج مستقبل کے چیلنجز کا پوری قوت سے مقابلہ کریں گی اور ان کی بہادری اور لگن سے ملک کا سنہری مستقبل تعمیر ہوگا۔