بانڈی پورہ میں فوجی گاڑی کو حادثہ‘ ۴ فوجی ہلاک

سرینگر//
جموں کشمیر کے ضلع بانڈی پورہ میں ہفتہ کے روز فوج کی ایک گاڑی سڑک سے پھسل کر وولر ویو پوائنٹ کے قریب گہری کھائی میں گر گئی جس کے نتیجے میں کم از کم چار فوجی ہلاک اور کچھ دیگر زخمی ہوگئے۔
بھارتی فوج کی چنار کور کا کہنا ہے کہ یہ حادثہ خراب موسم اور خراب نظر آنے کی وجہ سے پیش آیا۔
ایکس پر فوج کی پوسٹ میں کہا گیا ہے کہ زخمی فوجیوں کو فوری طور پر مقامی لوگوں کی مدد سے طبی دیکھ بھال کے لئے باہر نکالا گیا ، جس کے لئے ہم فوری مدد فراہم کرنے پر شہریوں کا شکریہ ادا کرتے ہیں۔
’’افسوس ناک طور پر اس بدقسمت حادثے میں تین بہادر وں نے اپنی جان گنوا دی۔ ہندوستانی فوج سوگوار خاندانوں کے ساتھ دلی تعزیت کا اظہار کرتی ہے‘‘۔
بعد ازاں چنار کور نے ایک اپ ڈیٹ شیئر کرتے ہوئے بتایا کہ ایک اور فوجی زخموں کی تاب نہ لاتے ہوئے دم توڑ گیا جس کے بعد مرنے والوں کی تعداد ۴ ہوگئی ہے۔
اس سے پہلے ضلع اسپتال بانڈی پورہ کے میڈیکل سپرنٹنڈنٹ ڈاکٹر مسرت اقبال وانی نے اے این آئی کو بتایا تھا کہ پانچ فوجیوں کو اسپتال لایا گیا تھا، جن میں سے دو کو مردہ حالت میں لایا گیا تھا اور باقی تین کی حالت نازک ہے۔ اس کے بعد تینوں فوجیوں کو سرینگر ریفر کر دیا گیا۔
یہ واقعہ منگل کی شام ضلع پونچھ میں لائن آف کنٹرول (ایل او سی) پر سڑک سے پھسلجانے کے بعد پانچ فوجیوں کی موت اور ڈرائیور سمیت پانچ دیگر افراد کے شدید زخمی ہونے کے ایک ہفتہ بعد پیش آیا ہے۔
یہ گاڑی چھ گاڑیوں کے قافلے کا حصہ تھی اور واقعہ کے وقت پونچھ کے قریب سڑک سے اتر کر نالے میں جا گری۔
جموں وکشمیر کے لیفٹیننٹ گورنر منوج سنہا نے بھی بانڈی پورہ سڑک حادثے میں تین فوجی جوانوں کے جاں بحق ہونے پرصدمے کا اظہار کیا ہے ۔
اپنے ایک تعزیتی پیغام میں سنہا نے کہا’’بانڈی پورہ حادثے میں تین فوجی اہلکارجاں بحق ہوئے ہیں‘‘۔ انہوں نے کہاکہ مصیبت کی اس گھڑی میں سوگوار خاندانوں کے شانہ بشانہ کھڑے ہیں اور زخمیوں کی جلد صحت یابی کے لئے دعاگوں ہیں۔
دریں اثنا وزیر اعلیٰ‘ عمر عبداللہ نے سڑک حادثہ میں شہید ہونے والے تین فوجی جوانوں کی المناک موت پر گہرے دکھ اور افسوس کا اظہار کیا ہے۔
اپنے تعزیتی پیغام میں وزیراعلیٰ نے سوگوار خاندانوں سے دلی ہمدردی کا اظہار کرتے ہوئے اس مشکل وقت میں صبر جمیل کی دعا کی۔
وزیر اعلیٰ نے مرحومین کی روحوں کیلئے سکون کی دعا کی اور حادثے میں زخمی ہونے والے فوجیوں کی جلد صحت یابی کی دعا کی۔