سارو گنگولی کی بیٹی کی گاڑی کو حادثہ

کولکتہ //
بھارتی کرکٹ ٹیم کے سابق کپتان سارو گنگولی کی بیٹی کی گاڑی کو حادثہ پیش آیا ہے۔
بھارتی میڈیا کے مطابق سارو گنگولی کی بیٹی ثناء جمعے کو اپنی گاڑی میں کولکتہ کے ڈائمنڈ ہاربر روڈ پر جا رہی تھیں کہ پیچھے سے ایک بس نے ان کی گاڑی کو زور دار ٹکر ماری۔
جس وقت یہ حادثہ پیش آیا ثناء اس وقت گاڑی کے اندر موجود تھیں اور گاڑی ڈرائیور چلا رہا تھا تاہم حادثے میں ثناء اور ڈرائیور محفوظ رہے۔
حادثے کے بعد بس کا ڈرائیور بس سمیت فرار ہو گیا جسے ثناء کے ڈرائیور نے کچھ فاصلے کے بعد روک لیا۔
میڈیا رپورٹس کے مطابق پولیس فوری طور پر موقع پر پہنچی اور اس نے بس ڈرائیور کو حراست میں لے لیا۔
ذرائع کا کہنا ہے کہ سارو گنگولی کی بیٹی ثناء کی گاڑی کو بس کی ٹکر سے معمولی نقصان پہنچا۔
پولیس کا کہنا ہے کہ اب تک کسی کی بھی جانب سے حادثے سے متعلق کوئی باضابطہ شکایت درج نہیں کرائی گئی۔