اقوام متحدہ کے امن دستوں پر فائرنگ کے واقعے کی چھان بین کر رہے ہیں: اسرائیل

تل ابیب//
اسرائیلی فوج نے کہا ہے کہ وہ جنوبی لبنان میں اقوام متحدہ کے امن فوجیوں پر حملوں کی تفصیلات کا تعین کرنے کے لیے جائزہ لے رہی ہے اور اس بات کی تحقیقات کر رہی ہے کہ آیا یہ واقعہ کیوں کر پیش آیا۔خیال رہے کہ جمعرات کو اسرائیلی فوج کی فائرنگ سے لبنان میں اقوام متحدہ کی امن فوج ’یونیفل‘ کے دو ارکان زخمی ہو گئے تھے۔
فوج نے کہا کہ اسے مطلع کیا گیا ہے کہ "جنوبی لبنان میں حز ب اللہ کے خلاف ’آئی ڈی ایف‘ کی کارروائی کے دوران اقوام متحدہ کے دو امن فوجی نادانستہ طور پر زخمی ہو گئے تھے۔
فوج کا کہنا ہے کہ ’آئی ڈی ایف‘ اس قسم کے واقعات پر گہری تشویش کا اظہار کرتا ہے اور فی الحال تفصیلات کا تعین کرنے کے لیے کمانڈ کی اعلیٰ سطح پر مکمل جائزہ لے رہا ہے‘‘۔