سابق آل رائونڈر سنتھ جے سوریا سری لنکا کی ٹیم کے ہیڈ کوچ مقرر

کولمبو //
سری لنکا کرکٹ (ایس ایل سی)نے سابق ٹیسٹ کرکٹر سنتھ جے سوریا کو ہیڈ کوچ مقرر کر دیا۔55 سالہ سنتھ جے سوریا کو سری لنکا کی قومی کرکٹ ٹیم کے ہیڈ کوچ کی تقرری کا باقاعدہ اعلان سری لنکا کرکٹ نے کیا ہے۔اس حوالے سے سری لنکا کرکٹ (ایس ایل سی) کا کہنا ہے کہ ایگزیکٹیو کمیٹی نے ٹیم کی اچھی کارکردگی کی بنیاد پر سنتھ جے سوریا کی بحیثیت ہیڈ کوچ تقرری کا فیصلہ کیا ہے۔
سری لنکن ٹیم نے بھارت، انگلینڈ اور نیوزی لینڈ کے خلاف سیریز میں اچھی کارکردگی دکھائی، ان سیریز میں جے سوریا سری لنکا کرکٹ ٹیم کے عبوری کوچ تھے۔ سری لنکا کرکٹ نے کہا کہ جے سوریا کا معاہدہ یکم اکتوبر 2024 سے نافذ العمل ہے اور یہ 31 مارچ 2026 تک چلے گا۔ جے سوریا کو ابتدائی طور پر رواں سال کے شروع میں ٹیم کا عبوری ہیڈ کوچ نامزد کیا گیا تھا، وہ اس سے قبل ایس ایل سی کے کرکٹ کنسلٹنٹ کے طور پر خدمات انجام دے چکے ہیں۔
عبوری ہیڈ کوچ کے طور پر جے سوریا کی پہلی ذمہ داری بھارت کے خلاف ہوم سیریز پر وائٹ بال سیریز تھی۔ بھارتی ٹیم نے ٹی ٹونٹی سیریز جیت لی تھی تاہم سری لنکا نے ون ڈے میں اچھی کارکردگی کا مظاہرہ کیا، پہلا کھیل ٹائی پر ختم ہوا اور پھر اگلے دو ون ڈے جیت کر سیریز جیت لی، 1997 کے بعد پہلی بار بھارتی ٹیم کے خلاف دو طرفہ سیریز جیتی۔سنتھ جے سوریا کو 110 ٹیسٹ،445 ون ڈے اور 31 ٹی ٹونٹی بین الاقوامی میچز میں سری لنکا کی نمائندگی کا اعزاز حاصل ہے۔