پہلے مرحلے کے پیش نظر سیکورٹی بند و بست مزید سخت

سرینگر//
جموں کشمیر اسمبلی انتخابات کے بدھ کو ہونے والی پہلے مرحلے کی پولنگ کے پیش نظر ان علاقوں جہاں پولنگ ہونے والی ہے ، میں سیکورٹی کے خاطر خواہ انتظامات کئے گئے ہیں۔
بتادیں کہ انتخابات کے پہلے مرحلے میں کل۹۰نشستوں میں سے۷؍اضلاع پر پھیلی ۲۴نشستوں کی پولنگ ۱۸ستمبر یعنی بدھ کے روز صبح۷بجے سے شروع ہو کر شام کے۶بجے اختتام پذیر ہوگی۔
پُر امن اور ہموار پولنگ کو یقینی بنانے کیلئے حکام نے ان علاقوں جہاں پولنگ ہونے والی ہے ‘میں سیکورٹی فورسز کی اضافی نفری کو تعینات کیا ہے اور مختلف مقامات پر چیک پوائنٹس بھی قائم کئے گئے ہیں۔
ذرائع نے بتایا کہ کسی بھی نا خوشگوار واقعے کو ٹالنے کیلئے بعض علاقوں میں نگرانی کو سخت کر دیا گیا ہے ۔
ذرائع نے کہا لوگوں کی نقل و حمل پر نظر رکھنے کیلئے اسٹریٹجک چوکیاں قائم کی گئی ہیں جبکہ فضائی نگرانی کے لئے سی سی ٹی وی کیمروں اور ڈرونز کا بھی استعمال کیا جا رہا ہے ۔
جموں و کشمیر میں جن اضلاع میں پہلے مرحلے کے لئے بدھ کو پولنگ ہو رہی ہے ان میں اننت ناگ، پلوامہ، شوپیاں، ڈوڈہ، رام بن اور کشتواڑ شامل ہیں۔
قابل ذکر ہے کہ انتخابات کے پہلے مرحلے کی ۲۴نشستوں کی پولنگ کیلئے کل۳ہزار۲سو۷۶پولنگ مراکز قائم کئے گئے ہیں جبکہ۱۴ہزار اہلکاروں پر مشتمل پولنگ عملے کو ان مراکز پر تعینات کیا گیا ہے ۔