امرناتھ یاترا کامیابی سے مکمل۔۱۲ء۵ لاکھ یاتریوں نے درشن کئے: امیت شاہ

نئی دہلی//
مرکزی وزیر داخلہ امیت شاہ نے چہارشنبہ کے روز کہا کہ امرناتھ یاترا کامیابی کے ساتھ مکمل ہوگئی ہے اور ریکارڈ تعداد میں ۱۲ء۵لاکھ سے زیادہ یاتریوں نے اس کا دورہ کیا ہے۔
جنوبی کشمیر کے ہمالیہ میں ۳۸۸۰ میٹر کی اونچائی پر واقع امرناتھ مندر کی یاترا ۲۹ جون کو شروع ہوئی اور۱۹؍اگست کو ختم ہوئی۔
وزیر داخلہ نے کہا کہ امرناتھ جی کی مقدس یاترا کامیابی سے مکمل ہوئی۔ اس سال یہ مقدس یاترا ۵۲ دنوں تک جاری رہی، ریکارڈ تعداد میں۱۲ء۵ لاکھ سے زیادہ یاتریوں نے بابا کی زیارت کی، جو گزشتہ ۱۲سالوں میں سب سے زیادہ تعداد ہے۔
اس دوران جنوبی کشمیر کے ضلع اننت ناگ کے پہلگام میں بدھ کے روز بھگوان شیو کی چاندی چھڑی مبارک کی سالانہ یاترا کامیابی کے ساتھ اختتام پذیر ہوئی جس کی آخری رسومات ’پوجن‘اور’وسرجن‘ ادا کی گئیں۔
مہنت دیپیندر گری (چاری مبارک کے متولی)، سیکورٹی اہلکاروں، ملک کے مختلف حصوں سے آئے کچھ سیاحوں اور رہائشیوں کی قیادت میں سادھوؤں کے ایک گروپ نے دریائے لڈر کے کنارے پوجا میں حصہ لیا۔