بنگلادیش میں سیاسی کشیدگی، ویمنز ٹی ٹونٹی ورلڈ کپ کا انعقاد خطرے میں پڑ گیا

لاہور //
بنگلادیش میں سیاسی کشیدگی کے باعث رواں سال اکتوبر میں شیڈول آئی سی سی ویمنز ٹی ٹونٹی ورلڈ کپ کا انعقاد خطرے میں پڑگیا۔ کرکٹ ویب سائٹ ’کرک انفو‘ کی جانب سے دعویٰ کیا گیا ہے کہ بنگلا دیش کے موجودہ سیاسی حالات کے پیش نظر ویمنز ٹی ٹونٹی ورلڈ کپ کے بیک اپ وینیوز میں بھارت، سری لنکا اور متحدہ عرب امارات شامل ہیں۔
دوسری جانب آئی سی سی کے ترجمان کا کہنا ہے کہ بنگلادیش میں صورتحال کو مانٹیر کیا جارہا ہے، صورتحال سےمتعلق آئی سی سی ، بنگلادیش کرکٹ بورڈ سے رابطے میں ہے۔ آئی سی سی ترجمان کا کہنا ہے کہ ہماری پہلی ترجیح ایونٹ میں شریک ہونے والے ممالک کی کھلاڑیوں کی حفاظت ہے۔ کرکٹ ویب سائٹ کے مطابق 3 ممالک نے اپنے شہریوں کو بنگلادیش کے لیے ٹریول ایڈوائزری جاری کی ہے۔
واضح رہے کہ نواں آئی سی سی ویمنز ٹی ٹونٹی ورلڈ کپ 2024ء بنگلا دیش میں 3 سے 20 اکتوبر تک شیڈول ہے۔ یاد رہے کہ بنگلا دیشی آرمی چیف جنرل وقار الزماں نے پیر کو اعلان کیا کہ وزیر اعظم شیخ حسینہ واجد نے استعفیٰ دے دیا اور اب ملک میں عبوری حکومت بنائی جائے گی۔ بنگلادیش میں 1971ء کی جنگ لڑنے والوں کے بچوں کو سرکاری نوکریوں میں 30 فیصد کوٹہ دیے جانے کیخلاف گزشتہ ماہ کئی روز تک مظاہرے ہوئے تھے جن میں 300 افراد ہلاک ہوئے جس کے بعد سپریم کورٹ نے کوٹہ سسٹم کو ختم کردیا تھا مگر طلبہ نے اپنے ساتھیوں کو انصاف نا ملنے تک احتجاج جاری رکھنے اور سول نافرمانی کی کال دے تھی اور ڈھاکا کی طرف مارچ کا اعلان کیا تھا۔