روح اللہ کا لوک سبھا میں جموں کشمیر میں اسمبلی انتخابات کا مطالبہ

نئی دہلی/۲۹جولائی
نیشنل کانفرنس کے رکن پارلیمنٹ روح اللہ مہدی نے پیر کے روز جموں و کشمیر میں جلد از جلد انتخابات کرانے کا مطالبہ کیا۔
سپریم کورٹ نے الیکشن کمیشن کو جموں و کشمیر میں 30 ستمبر تک انتخابات کرانے کی ہدایت دی تھی۔ الیکشن کمیشن نے ابھی تک انتخابات کے شیڈول کا اعلان نہیں کیا ہے۔
لوک سبھا میں مرکزی بجٹ پر بحث میں حصہ لیتے ہوئے مہدی نے کہا کہ صرف ایک مہینہ باقی ہے اور انتخابات کے انعقاد کے لئے کوئی عمل شروع نہیں کیا گیا ہے۔
مہدی نے کہا”میں یہاں انتخابات کی بھیک مانگنے نہیں آیا ہوں۔ سپریم کورٹ نے اس حکومت کو ہدایت دی تھی کہ ستمبر تک ایک جمہوری حکومت تشکیل دی جائے۔ صرف ایک مہینہ باقی رہ گیا ہے اور ابھی تک انتخابات کا کوئی عمل شروع نہیں ہوا ہے۔میں درخواست کرتا ہوں کہ جمہوریت کی روح کےلئے انہیں ہدایت دیں کہ سپریم کورٹ کے حکم پر عمل کیا جائے اور انتخابات کرائے جائیں“۔
گزشتہ دسمبر میں سپریم کورٹ نے سابق ریاست جموں و کشمیر کو خصوصی درجہ دینے والے آرٹیکل 370 کی دفعات کو منسوخ کرنے کے مرکز کے فیصلے کو برقرار رکھا تھا اور ریاست کا درجہ جلد از جلد بحال کرنے کی ہدایت دی تھی۔
اس نے کہا تھا کہ اسمبلی انتخابات 30 ستمبر 2024 تک ہونے چاہئیں۔
مارچ میں لوک سبھا انتخابات کے شیڈول کا اعلان کرتے ہوئے الیکشن کمیشن نے کہا تھا کہ جموں و کشمیر میں اسمبلی اور پارلیمانی انتخابات ایک ساتھ کروانا لاجسٹک اور سیکورٹی وجوہات کی بنا پر عملی نہیں ہے۔
جموں و کشمیر میں جب بھی اسمبلی انتخابات ہوں گے تو اگست 2019 میں آئین کے آرٹیکل 370 کی منسوخی اور جموں و کشمیر کو دو مرکز کے زیر انتظام علاقوں میں تقسیم کرنے کے بعد یہ پہلا انتخاب ہوگا۔ (ایجنسیاں)