دُور اندیش بجٹ کیلئے وزیر اعظم مودی اور وزیر خزانہ سیتارمن کا شُکریہ

سرینگر//
لیفٹیننٹ گورنر منوج سِنہا نے ۲۵۔۲۰۲۴ ء کے دور اندیش بجٹ کے لئے وزیر اعظم نریندر مودی اور وزیر خزانہ نرملا سیتارمن کا شکریہ اَدا کیا ہے۔
سنہا نے کہا کہ بجٹ۲۰۲۴ء سے اِقتصادی ترقی میں تیزی آئے گی،’وِکست بھارت‘ کیلئے دور رس اصلاحات میں سہولیت ملے گی اور ’کاروبار کرنے میں آسانی‘ اور ’زندگی گزارنے میں آسانی‘ میں اضافہ ہوگا۔
لیفٹیننٹ گورنر نے کہا’’روزگار، ہنرمندی، ایم ایس ایم ایز اور متوسط طبقے پر توجہ مرکوز کرتے ہوئے اس بجٹ میں آبادی کے تمام طبقوں کو بااِختیار بنانے کے ویژن کا ترجمانی کرنے کی کوشش کی گئی ہے۔ سب کیلئے کافی مواقع پیدا کرنے کی نو ترجیحات جیسا کہ بجٹ میں تصور کیا گیا ہے ، تیزتر ترقی اور سماجی مساوات کو یقینی بنائے گی۔‘‘
سنہا نے کہا کہ بجٹ۲۱ ویں صدی کے چیلنجوں کا مقابلہ کرتا ہے اور نوجوانوں ، خواتین ، کسانوں اور کاروباریوں کو بے شمار مواقع فراہم کرتا ہے اور خوشحال دیہی ہندوستان کے لئے منصوبہ بندی کرتا ہے۔ انہوں نے کہا کہ اس بجٹ سے مضبوط زرعی انفراسٹرکچر اور شہری ترقی میں تیزی آئے گی۔
لیفٹیننٹ گورنر نے کہا کہ زراعت میں پیداواری صلاحیت پر توجہ مرکوز کرنے اور بجٹ میں جن اقدامات کا ذکر کیا گیا ہے ان سے جموں و کشمیر کو بہت فائدہ ہوگا۔ نیچرل فارمنگ، تیل دار اجناس کے مشن، سبزیوں کی پیداوار، سپلائی چین اور قومی کوآپریشن کسانوں،دیہاتوں اور مزدوروں کے لئے جامع ترقی کو یقینی بنائے گا۔
ایل جی نے کہا کہ جموں کشمیر نے۲۱ ویں صدی کے مواقع سے فائدہ اٹھایا ہے اور ہمارے نوجوان ایک قابل فخر اور خوشحال یوٹی کی تعمیر کر رہے ہیں۔ اُنہوںنے کہا کہ بجٹ۔ ۲۰۲۴ میں روزگار اور ہنر مندی پر توجہ مرکوز کی جائے گی اور نئی سکیموں سے نوجوانوں کو بااِختیار بنانے کو نئی ترغیب ملے گی اور اس سے اَفرادی قوت میں خواتین کی زیادہ سے زیادہ شرکت کی راہ ہموار ہوگی۔
سنہا نے کہا کہ قبائلی اکثریتی دیہاتوں اور اسپریشنل اضلاع میں قبائلی کنبوں کے لئے کوریج کی خاطر پردھان منتری جنجاتیہ اْنّت گرام ابھیان گیم چینجر ثابت ہوگا۔
لیفٹیننٹ گورنر نے کہا کہ بجٹ۲۰۲۴ ء اس بات کو یقینی بناتا ہے کہ نچلی سطح پر نظام مضبوط اور لوگ سماجی اِنصاف کے ثمرات سے لطف اندوز ہوں۔