بابر تینوں فارمیٹس میں نمبر ایک بلے باز بن سکتے ہیں: کارتک

دبئی//ہندوستانی ٹیم میں واپسی کرنے والے تجربہ کار وکٹ کیپر بلے باز دنیش کارتک کا ماننا ہے کہ پاکستان کے کپتان بابر اعظم جلد ہی کرکٹ کے تینوں فارمیٹس میں نمبر ایک رینک بلے باز بن سکتے ہیں۔
بابر اس وقت ٹی ٹوئنٹی اور ون ڈے میں نمبر ون بلے باز ہیں۔ کارتک کو پورایقین ہے کہ وہ جلد ہی تاریخ کے ایسے پہلے بلے باز بن جائیں گے، جوتینوں فارمیٹس میں نمبر ایک ہو۔ دی آئی سی سی ریویو پروگرام میں کارتک نے کہا، "ان کا تینوں فارمیٹس میں ٹاپ پر پہنچنا صد فیصد یقینی ہے۔ وہ ایک کلاس پلیئر ہیں جو اس وقت اپنی بلے بازی میں سب سے اوپر ہے۔ وہ تینوں فارمیٹس کھیلتے ہیں اور مختلف آرڈرز پربلے بازی بھی کرسکتے ہیں۔ "انہیں آنے والے کچھ وقت میں کافی ٹیسٹ کرکٹ بھی کھیلناہے۔ میرے خیال میں ان میں یہ صلاحیت ہے کہ وہ ایسا کرسکتے ہیں۔”
کارتک کا خیال ہے کہ بابر نے اپنی بلے بازی تکنیک میں جو تبدیلیاں کی ہیں، اس سے انہیں فائدہ ہوسکتاہے۔ انہوں نے کہا، "بلے بازی کے دوران ان کا توازن اور ٹائمنگ دیکھنے کے قابل ہوتی ہے۔ چاہے فرنٹ فٹ ہو یا بیک فٹ، وہ گیند کو زبردست طریقے سےاسٹرائیک کرتے ہیں۔ یہی چیز انہیں ایک خاص کھلاڑی بناتی ہے۔ موجودہ وقت میں کھیل رہے کرکٹروں میں فی الحال ان کے پاس ابھی سب سے زیادہ وقت ہے۔ اگرآپ بین الاقوامی کرکٹ کھیل رہے ہیں تو آپ کو مسلسل کچھ نہ کچھ تبدیلیاں کرنی ہوتی ہیں۔ یہ تبدیلی اگرایک فیصد بھی ہے تب بھی آپ اس سے بڑا فائدہ اٹھا سکتے ہیں۔”
بابر اس وقت ٹیسٹ کرکٹ میں پانچویں نمبر کے بلے باز ہیں۔ ان کے اوپر مارنس لیبوشین اورفیب فور کے تین کھلاڑی جو روٹ، اسٹیو اسمتھ اور کین ولیمسن ہیں۔ کارتک کا خیال ہے کہ بابر اس کلب میں شامل ہو کر فیب فور کو ‘فیب فائیو’ بنا سکتے ہیں۔