گلوبل ساؤتھ کے لیے اہم مدوں پر بات چیت کریں گے : مودی

نئی دہلی//وزیر اعظم نریندر مودی نے جی-7 آؤٹ ریچ سمٹ میں حصے لینے کے لیے اٹلی روانہ ہونے سے پہلے کہا کہ انہیں اس کانفرنس میں ان مدوں پر بات چیت کرنے کا موقع ملے گا جو گلوبل ساؤتھ کے لیے اہم ہیں۔
مسٹر مودی نے اپنے تیسرے دور کے پہلے غیر ملکی دورے پر روانہ ہونے سے قبل اپنے بیان میں یہ بات کہی۔ وزیر اعظم نے کہا، "وزیر اعظم جارجیا میلونی کی دعوت پر، میں 14 جون 2024 کو جی-7 آؤٹ ریچ چوٹی کانفرنس میں شرکت کے لیے اٹلی کے اپولیا علاقے کا سفر کر رہا ہوں۔ مجھے خوشی ہے کہ لگاتار تیسری مدت کے لیے میرا پہلا دورہ جی-7 سربراہی اجلاس کے لیے اٹلی کا ہے ۔
انہوں نے کہا، ‘‘میں 2021 میں جی 20 سربراہی اجلاس کے لیے اپنے اٹلی کے دورے کو گرمجوشی سے یاد کرتا ہوں۔ گزشتہ سال وزیر اعظم میلونی کے ہندوستان کے دو دورے ہمارے دو طرفہ ایجنڈے کو رفتار اور گہرائی لانے میں مددگار ثابت ہوئے ہیں۔ ہم ہندوستان-اٹلی اسٹریٹجک پارٹنرشپ کو مضبوط بنانے اور ہند-بحرالکاہل اور بحیرہ روم کے خطوں میں تعاون کو بڑھانے کے لئے پرعزم ہیں۔
مسٹر مودی نے کہا، "آؤٹ ریچ سیشن میں بات چیت کے دوران مصنوعی ذہانت، توانائی، افریقہ اور بحیرہ روم پر مرکوز ہوگی۔ یہ ہندوستان کی زیر صدارت منعقدہ جی20 سمٹ اور آئندہ جی 7 چوٹی کانفرنس کے نتائج کے درمیان زیادہ ہم آہنگی لانے اور ان مدوں پر تبادلہ خٰال کرنے کا موقع ہوگا جو گلوبل ساؤتھ کے لئے اہم ہیں۔
وزیر اعظم نے کہا کہ وہ سربراہی اجلاس میں شریک دیگر رہنماؤں سے بھی ملاقات کے منتظر ہیں۔