جموںکشمیر میں بجلی نظام کو بہتر بنانے کیلئے اٹھارہ ہزار کروڑ روپے منظور :گرجر

سانبہ//
مرکزی وزیر مملکت برائے بجلی ‘کرشن پال گرجر نے پیر کے روز بتایا کہ مودی حکومت جموں وکشمیر کی ترقی کیلئے کافی سنجیدہ ہے ۔
گرجر نے بتایا کہ جموں وکشمیر میں بجلی نظام کو بہتر بنانے کی خاطر اٹھارہ ہزار کروڑ روپے منظور کئے گئے ہیں۔
ان باتوں کا اظہار وزیر مملکت نے سانبہ میں تقریب کے حاشیہ پر ذرائع ابلاغ کے نمائندوں سے بات چیت کے دوران کیا۔
وزیر مملکت نے بتایا کہ جموں وکشمیر کی ترقی کے حوالے سے موجودہ مرکزی حکومت کافی سنجیدہ ہے ۔انہوں نے کہا کہ جموں وکشمیر میں بجلی نظام کو بہتر بنانے کے لئے اٹھارہ ہزار کروڑ روپے منظور کئے گئے ہیں ۔اُن کے مطابق یوٹی میں بجلی سسٹم کو درست کرنے کی خاطر زمینی سطح پر اقدامات اُٹھائے جارہے ہیں ۔
گرجر نے بتایا کہ آئے روز مرکزی وزراء جموں وکشمیر کے دورے پر آئے ہیں جو اس بات کا ثبوت ہے کہ مرکزی حکومت یوٹی کی تعمیر وترقی اور یہاں کے لوگوں کے مسائل حل کرنے کی خاطر کافی سنجیدہ ہے ۔
اس سے قبل مقامی لوگوں کے ایک وفد نے مرکزی وزیر مملکت سے ملاقات کے دوران جائز مسائل اُبھارے ۔
گرجرنے جموں و کشمیر کے ترقیاتی پروفائل کو نئی بلندیوں تک لے جانے کیلئے مرکزی حکومت کے اقدامات کو اجاگر کرتے ہوئے کہا کہ مرکزی اسپانسر شدہ اسکیموں کے دائدہ کو یقینی بناتے ہوئے ترقیاتی کاموں کی باقاعدہ تشخیص اور جائیزہ لینے پر توجہ دی جا رہی ہے ۔ اس سلسلے میں جموں و کشمیر یو ٹی کیلئے مرکزی حکومت کے نمائندوں کے ہائی پروفائل ٹور پروگرام منعقد کئے جا رہے ہیں ۔
مرکزی وزیر مملکت نے متعدد انقلابی اقدامات کے ذریعے جموں و کشمیر کے ترقیاتی پروفائل کو تبدیل کرنے کیلئے وزیر اعظم نریندر مودی کے عزم کو دوہراتے ہوئے کہا ’’ مرکز اور یو ٹی حکومت کے درمیان مضبوط تعاون تمام ترقیاتی محاذوں پر ٹھوس نتائج دے رہا ہے ‘‘ ۔
اس سے قبل وزیر مملکت نے ممبر پارلیمنٹ جگل کشور شرما کے ساتھ بگوٹہ گاؤں کا دورہ کیا اور حب الوطنی کے نعروں کے درمیان ایم وی سی برگیڈئیر راجندر سنگھ جموال کو خراجِ عقیدت پیش کیا ۔
گرجر نے پرایمری ہیلتھ سنٹر کی عمارت راہیا پر نبارڈ کے تحت۰ء۲ کروڑ روپے کی تخمینہ لاگت سے جاری تعمیراتی کام کا معائینہ کیا ۔ انہوں نے برگیڈئیر راجندر سنگھ میموریل پارک کے قریب مقامی تالاب پر کئے جانے والے بحالی کے کاموں کا بھی جائزہ لیا ۔
مرکزی وزیر مملکت نے ڈی سی آفس میں ڈسٹرکٹ ڈیولپمنٹ کونسل ممبران ، بلاک ڈیولپمنٹ کونسل ممبران ، کونسلرز اربن لوکل باڈیز اور مقامی نوجوانوں کے ساتھ تفصیلی بات چیت کی ۔ انہوں نے شرکاء کو یقین دلایا کہ ان کے پیش کردہ تمام مسائل اور خدشات کو جلد از جلد حل کرنے کیلئے متعلقہ وزارتوں کے ساتھ اٹھایا جائے گا ۔
گرجر نے بتایا کہ حال ہی میں مرکزی حکومت نے جموں و کشمیر کیلئے ۱۲ہزار کروڑ روپے فی ڈویژن ۶ ہزار کروڑ روپے بجلی کے بنیادی ڈھانچے کو بہتر بنانے کیلئے مناسب بجلی کی فراہمی کو یقینی بنانے کے علاوہ چوری کوروکنے اور مجموعی تکنیکی اور تجارتی ( اے ٹی اینڈ سی ) نقصانات کو کم کرنے کیلئے منظوری دی ہے ۔