پیٹرولیم مصنوعات پر ایکسائز ڈیوٹی میں کمی

نئی دہلی//
حکومت نے مہنگائی سے پریشان ملک کے لوگوں کو راحت دینے کرنے کے مقصد سے پٹرول اور ڈیزل پر ایکسائز ڈیوٹی میں بالترتیب۵ء۹روپے فی لیٹر اور۷ روپے فی لیٹر کمی کرنے کا فیصلہ کیا ہے ۔
اس کے ساتھ پردھان منتری اجولا یوجنا کے استفادہ کنندگان کو ایل پی جی پر فی سلنڈر ۲۰۰روپے کی سبسڈی بھی دی جائے گی اور سیمنٹ، اسٹیل اور پلاسٹک کی مصنوعات کی قیمتوں کو کم کرنے کے لیے اقدامات کیے جا رہے ہیں۔
سماجی رابطوں کی ویب سائٹ ٹوئٹر پر آج یہ اعلان کرتے ہوئے وزیر خزانہ نرملا سیتا رمن نے کہا کہ وزیر اعظم نریندر مودی کے اقتدار سنبھالتے ہی مودی حکومت غریبوں کی فلاح و بہبود کے لیے وقف ہو گئی ہے ۔ غریب اور متوسط طبقے کے خاندانوں کی مدد کیلئے بہت سے اقدامات کیے گئے ہیں، جس کے نتیجے میں مودی حکومت کے دور میں اوسط مہنگائی پہلے کی حکومتوں کے مقابلے میں کم رہی ہے ۔
وزیر خزانہ نے کہا کہ وزیر اعظم کے غریب اور عام لوگوں سے کیے گئے وعدے کے مطابق آج کئی اقدامات کیے جا رہے ہیں جس میں پیٹرول پر ۸روپے فی لیٹر اور ڈیزل پر ۷روپے فی لیٹر ایکسائز ڈیوٹی کم کی گئی ہے ۔
اس کمی کے بعد پیٹرول۵ء۹روپے فی لیٹر اور ڈیزل۷روپے فی لیٹر سستا ہو جائے گا۔ اس کٹوتی کی وجہ سے حکومت کو تقریباً ایک لاکھ روپے سالانہ کے ریونیو کا نقصان ہوگا۔ انہوں نے نومبر میں ایکسائز ڈیوٹی میں کمی کے دوران ویٹ میں کمی نہ کرنے والی تمام ریاستی حکومتوں سے ویٹ کم کرنے کی اپیل کی اور کہا کہ ریاستی حکومتوں کو بھی عام لوگوں کو راحت فراہم کرنی چاہئے ۔
وزیر خزانہ نے کہا کہ اس سال پردھان منتری اجولا یوجنا کے استفادہ کنندگان کو ایک سال میں۱۲سلنڈر کیلئے ۲۰۰روپے فی سلنڈر کی سبسڈی دینے کا بھی فیصلہ کیا گیا ہے ۔ اس سے نو کروڑ مستفیدین کو فائدہ ہوگا اور اس سے ۶۱۰۰کروڑ روپے کی آمدنی متاثر ہوگی۔
سیتا رمن نے کہا کہ اس کے ساتھ درآمد پر منحصر پلاسٹک کی مصنوعات کے خام مال پر کسٹم ڈیوٹی بھی کم کی جا رہی ہے ۔ اس سے اس کی مصنوعات کی قیمتوں میں کمی آئے گی۔ لوہے اور اسٹیل کے خام مال پر کسٹم ڈیوٹی کو معقول بنایا جا رہا ہے جس سے اسٹیل کے خام مال پر درآمدی ڈیوٹی کم ہو جائے گی۔ سیمنٹ کی دستیابی بڑھانے کے لیے بھی اقدامات کیے جا رہے ہیں جس سے اس کی قیمتیں بھی نیچے آئیں گی۔
اس دوران وزیر اعظم نریندر مودی نے ہفتہ کو پٹرول اور ڈیزل کی قیمتوں میں کمی کے فیصلے کا خیرمقدم کرتے ہوئے کہا کہ عوام ہمیشہ حکومت کیلئے سب سے پہلے رہے ہیں۔ انہوں نے کہا کہ پٹرول اور ڈیزل کی قیمتوں میں کمی سے مختلف شعبوں پر مثبت اثرات مرتب ہوں گے ۔
مودی نے ٹویٹ کیا’’لوگ ہمیشہ ہمارے لیے پہلے رہے ہیں۔ آج کے فیصلے کا مختلف شعبوں پر مثبت اثر پڑے گا، خاص طور پر پٹرول اور ڈیزل کی قیمتوں میں زبردست کٹوتی۔ اس سے ہمارے شہریوں کو راحت ملے گی اور ان کی زندگی آسان ہو جائے گی‘‘۔
اجولا اسکیم کے تحت گھریلو گیس کنکشن کے ساتھ سلنڈر پر۲۰۰روپے کی سبسڈی کے اعلان پر وزیر اعظم نے کہا’’اجولا نے کروڑوں ہندوستانیوں، خاص طور پر خواتین کی مدد کی ہے ۔ اس پر سبسڈی دینے کے آج کے اعلان سے غریب خاندانوں کو بڑی راحت ملے گی۔‘‘