لوک سبھا انتخابات کے پہلے مرحلے کی۱۰۲سیٹوں پر نامزدگی کا عمل شروع

نئی دہلی//
ملک میں۱۸ویں لوک سبھا کیلئے سات مرحلوں میں ہونے والے انتخابات کے لیے نامزدگی کا عمل بدھ کو شروع ہوگیا ۔
الیکشن کمیشن نے بدھ کی صبح عام انتخابات کے پہلے مرحلے میں۱۷ریاستوں اور مرکز کے زیر انتظام چار علاقوں کی کل۱۰۲لوک سبھا سیٹوں کیلئے نوٹیفکیشن جاری کیا۔
اس کے ساتھ ہی ان نشستوں پر امیدواروں کی طرف سے کاغذات نامزدگی داخل کرنے کا عمل شروع ہو گیا۔پہلے مرحلے کی ووٹنگ۱۹؍اپریل کو ہوگی۔
پہلے مرحلے میں تمل ناڈو سے۳۳‘ راجستھان سے۱۲‘اتر پردیش سے آٹھ‘مدھیہ پردیش سے چھ، اتراکھنڈ، آسام اور مہاراشٹر سے پانچ، پانچ، بہار سے چار، مغربی بنگال سے تین، اروناچل پردیش، منی پور اور منی پور سے دو، دو، میگھالیہ، چھتیس گڑھ، میزورم، ناگالینڈ، سکم، تریپورہ، انڈمان اور نکوبار جزائر، جموں و کشمیر، لکشدیپ اور پڈوچیری میں ایک، ایک سیٹ کے لیے انتخابات ہوں گے ۔
اس مرحلے میں بہار کے علاوہ تمام متعلقہ ریاستوں اور مرکز کے زیر انتظام علاقوں میں اس مہینے کی ۲۷ تاریخ تک کاغذات نامزدگی داخل کئے جاسکتے ہیں اور کاغذات کی جانچ پڑتال۲۸مارچ کو ہوگی اور۳۰ مارچ تک نام واپس لیے جاسکتے ہیں۔
بہار میں کاغذات نامزدگی داخل کرنے کی آخری تاریخ۲۸مارچ ہے اور کاغذات نامزدگی کی جانچ ۲اپریل کو ہوگی۔
لوک سبھا کی کل۵۴۳سیٹوں کیلئے۱۹؍اپریل سے یکم جون تک سات مرحلوں میں عام انتخابات کرائے جا رہے ہیں۔ ووٹوں کی گنتی۴جون کو ہوگی اور انتخابی عمل۶جون تک مکمل ہوگا۔
دنیا کے اس سب سے بڑے انتخابی میلے میں کل تقریباً۹۷کروڑ ووٹر اپنا حق رائے دہی کا استعمال کر سکیں گے ۔