بی جے پی دہلی حکومت کو بدنام کرنے کی کوشش کر رہی ہے : اے اے پی

نئی دہلی//عام آدمی پارٹی نے کہا کہ بھارتیہ جنتا پارٹی (بی جے پی) دہلی کے سیوریج سسٹم کو جام کرکے دہلی حکومت کو بدنام کرنے کی کوشش کر رہی ہے ۔
عام آدمی پارٹی کے سینئر لیڈر درگیش پاٹھک نے پیر کو سیور کا ایک ویڈیو اور کچھ تصاویر دکھاتے ہوئے کہا کہ دہلی کے زیادہ تر لوگ سیور اوور فلو کی پریشانی سے دوچار ہیں، جس کی وجہ سے ان کی زندگی مشکل ہو گئی ہے ۔ یہ مسئلہ دہلی کے کئی مقامات پر دیکھا جا رہا ہے ۔ دہلی جل بورڈ کے لوگ وہاں جا کر صفائی کر رہے ہیں۔ جب وہ ملبہ ہٹانے کی کوشش کرتے ہیں تو ریت اور سیمنٹ سے بھرے تھیلے نکلتے ہیں۔ اس سے صاف ظاہر ہوتا ہے کہ بوریاں جان بوجھ کر رکھی گئی ہیں تاکہ گٹر بند ہو جائیں اور گندہ پانی لوگوں تک پہنچے ۔ انہوں نے کہا کہ انہیں یہ کہنے میں کوئی جھجک نہیں ہے کہ پوری دنیا میں بی جے پی جیسی بری پارٹی ملنا مشکل ہے ۔
اے اے پی کے لیڈر نے کہا کہ جان بوجھ کر کچرا گٹر میں پھینکنے کا مقصد وزیر اعلی اروند کیجریوال کو بدنام کرنا ہے ۔ بی جے پی یہ سب ایک سازش کے تحت کر رہی ہے ۔ اگر کسی ایک سیور میں بوری ملتی تو ہم اسے اتفاق سمجھ سکتے تھے لیکن گزشتہ 10 دنوں میں کئی مقامات پر ملبے سے بھری بوریاں ملی ہیں۔ دہلی کے ایسے کئی مقامات پر اوور فلو ہے جہاں 25 سال سے اوور فلو کا کوئی مسئلہ نہیں ہوا۔ یہ سب اتفاق نہیں ہو سکتا۔
مسٹر پاٹھک نے کہا کہ مسٹر کیجریوال کی قیادت میں دہلی میں محلہ کلینک بنائے گئے ۔ اسکول اور اسپتال بہترین ہو گئے ، بجلی اور پانی مفت ہو گیا۔ آپ بھی کچھ کام کرکے دکھاو۔ کبھی مرکزی حکومت کی مدد سے اور کبھی لیفٹیننٹ گورنر کی مدد سے ہمارے کام کو روکنے کی کوشش کی جاتی ہے ۔ دہلی کے لوگ اس طرح کی سستی سیاست کی وجہ سے بی جے پی کو ووٹ نہیں دیں گے ۔ دہلی کے لوگ جانتے ہیں کہ کون کام کر رہا ہے اور کون کام نہیں کر رہا ہے ۔ بی جے پی کو دہلی کے لوگوں سے معافی مانگنی چاہیے ۔ عام آدمی پارٹی اس پورے معاملے کی تحقیقات کا مطالبہ کرتی ہے ۔