مودی نے کشمیر کو مایوسی کے طویل ڈراؤنے خواب سے باہر نکالا

سرینگر//
وزیر اعظم دفتر میں تعینات وزیر مملکت ڈاکٹر جتیندر سنگھ نے جمعرات کے روز کہاکہ بخشی اسٹیڈیم سرینگر میں عوام الناس کا سیلاب اس بات کی غمازی کرتا ہے کہ کشمیری عوام مودی جی سے والہانہ محبت کرتے ہیں۔
ڈاکٹر سنگھ نے کہاکہ جموں کشمیر بدل گیا ہے ، بندوقوں اور پتھروں کی جگہ اب کمپیوٹر اور آئی پیڈ نے لی ہے ۔ان باتوں کا اظہار مرکزی وزیر نے سری نگر میں عوامی ریلی سے خطاب کے دوران کیا۔
مرکزی وزیر مملکت نے کہاکہ وزیر اعظم نریندر مودی ہم سب کے محبوب رہنما اور دنیا کے مقبول ترین وزیر اعظم ہیں جن کی آواز دنیا کے ہر ملک میں سنجیدگی کے ساتھ سنی جاتی ہے ۔
ڈاکٹر سنگھ نے کہا’’بخشی اسٹیڈیم سرینگر میں عوامی سیلاب اس بات کا عکاس ہے کہ کشمیر کے لوگ نریندر مودی کو بے حد پسند کرتے ہیں‘‘۔
مرکزی وزیر مملکت نے مزید بتایا کہ سرینگر میں لوگوں کا ہجوم مودی کا پریوار ہے اور یہ پریوار جمعرات کی صبح سے ہی مودی جی کی آمد کا منتظر تھا۔ان کے مطابق وزیر اعظم نریندر مودی نے جموں وکشمیر کے عوام کو بدحالی کے دلدل سے نجات دلا کر ان کا مقدر بدل دیا۔
ان کے مطابق جموں وکشمیر اب بدل گیا ہے جن ہاتھوں میں کل تک بندوق تھی آج ان میں آئی پیڈ اور کمپیوٹر ہیں۔وہ انگلیاں جو کل تک خون سے رنگی ہوئی تھی آج پشمینہ کے دھاگے سے اپنے ہنر دکھا رہی ہیں۔
ڈاکٹر سنگھ نے کہاکہ کشمیر میں اداسی کے بادل چھٹ چکے ہیں اور آج دریائے جہلم سے امید کا ساگر چھلک رہا ہے ۔انہوں نے کہاکہ کشمیر کا ہر شہری وزیر اعظم کی انگلی پکڑ کر وکست بھار ت اور وکست جموں وکشمیر کے کارواں میں شامل ہو گیا ہے ۔
مرکزی وزیر نے مزید بتایا کہ وزیر اعظم مودی کی سربراہی میں جموں وکشمیر اس وقت ترقی کی راہ پر گامزن ہے ۔مرکزی وزیر نے کہاکہ مودی جی کی ریلی میں شرکت کے لئے لوگوں میں کافی جوش اور جذبہ پایا گیا۔