مودی پر لالو کے تبصروں کا عوام مناسب جواب دیں گے : بی جے پی

نئی دہلی// بھارتیہ جنتا پارٹی (بی جے پی) نے اپوزیشن کے انڈیا گٹھ بندھن کی ریلی میں راشٹریہ جنتا دل کے لیڈر لالو پرساد کے ذریعہ وزیراعظم نریندر مودی کے خاندان کے سلسلے میں کئے گئے تبصروں پر سخت رد عمل ظاہر کیا اور کہا کہ عوام اچھی طرح سے سمجھتے ہیں کہ مسٹر مودی کے لئے پورا ملک ان کا کنبہ ہے اور آنے والے انتخابات میں عوام اس کا مناسب جواب ضرور دیں گے ۔
دریں اثنا، بی جے پی رہنماؤں نے اپنے سوشل میڈیا ہینڈل پر اپنے نام سے پہلے "مودی کا پریوار” شامل کیا۔ بی جے پی کے صدر جگت پرکاش نڈا، وزیر داخلہ امت شاہ، شہری ہوا بازی اور فولاد کے وزیر جیوترادتیہ سندھیا، کامرس و صنعت کے وزیر پیوش گوئل وغیرہ نے اپنے ایکس ہینڈلز پر یہ تبدیلیاں کیں۔
بھارتیہ جنتا پارٹی نے ایکس پر اپنی پوسٹ میں لکھا کہ ‘‘بدعنوانی اور راج شاہی ذہنیت میں ڈوبے ہوئے لوگوں کو سمجھنا چاہیے کہ ملک کا ایک ایک فرد مودی کا پریوار ہے ۔’’
بی جے پی کے ترجمان اور ایم پی سدھانشو ترویدی نے پارٹی کے مرکزی دفتر میں ایک پریس کانفرنس میں کہا، "جیسے جیسے ملک انتخابات کی طرف بڑھ رہا ہے ، بے چین اور پریشان اپوزیشن کی محبت کی دکان سے ایک کے بعد ایک زہریلی چیزیں باہر نکل رہی ہیں۔انہوں نے پٹنہ ریلی میں آر جے ڈی لیڈر لالو پرساد کے بیان کوافسوسناک اور تکلیف دہ قراردیا۔
مسٹر ترویدی نے کہا کہ مسٹر مودی کے لئے ان کی فیملی ،پورا ملک ہے ۔ ہم دیوالی جیسے تہوار اپنے خاندانوں کے ساتھ مناتے ہیں، جب کہ 2014 کے بعد، وزیراعظم مودی ہر دیوالی کسی نہ کسی سرحدی چوکی پر فوج کے جوانوں کے ساتھ مناتے رہے ہیں۔ کئی دہائیوں پہلے انہوں نے اپنے اہل و عیال کو چھوڑ دیا تھا اور ملک کو اپنا کنبہ سمجھتے تھے ۔ لال قلعہ کی فصیل سے قوم سے خطاب کرتے ہوئے انہوں نے کہا، ‘میرے پریوارجنو ‘ کہا تھا۔
بی جے پی کے ترجمان نے کہا کہ وزیر اعظم مودی نے اسی فیملی جذبے کے ساتھ 2047 تک ملک کو ترقی یافتہ بنانے کا ہدف مقرر کیا ہے ۔ کیا کسی اپوزیشن پارٹی یا گٹھ بندھن نے ہندوستان کی ترقی کا ہدف مقرر کیا ہے ؟ ان کے لیے ان کی فیملی ہی ان کا ملک ہے اور اپنی فیملی کی معیشت کو مضبوط کرنے کا مطلب ملک کو نمبر 1 بنانا ہے ۔