ریاسی سڑک حادثے میں دو افراد جاں بحق، دو دیگر زخمی

جموں//
جموںکشمیر کے ریاسی ضلع کے تھب گاؤں میں نجی گاڑی کو حادثہ پیش آیا جس کے نتیجے میں گاڑی میں سوار دو افراد برسر موقع ہی جاں بحق ہوئے جبکہ مزید دوکی حالت تشویشناک بنی ہوئی ہے۔
اطلاعات کے مطابق منگل کے روز ریاسی ضلع کے تھب گاؤں کے نزدیک ایک گاڑی ڈرائیور کے قابو سے باہر ہو کر گہری کھائی میں جاگری جس کے نتیجے میں چار افراد شدید طورپر زخمی ہوئے۔
معلوم ہوا ہے کہ حادثے کی اطلاع ملتے ہی مقامی لوگ جائے موقع پر پہنچے اور زخمیوں کو علاج ومعالجہ کی خاطر نزدیکی ہسپتال منتقل کیا تاہم وہاں پر تعینات ڈاکٹروں نے دو افراد کو مردہ قرار دیا۔
متوفین کی شناخت رشپال سنگھ ولد منشی رام اور گنیش سنگھ ولد بلدیو سنگھ ساکنان تھب ریاسی کے بطور ہوئی ہے۔ زخمیوں کی پہچان راج سنگھ ولد بلدیو سنگھ اور سنجے ولد منشی رام کے بطور کی گئی ہے۔
ذرائع نے بتایا کہ زخمیوں کی بھی حالت تشویشناک بنی ہوئی ہے۔دریں اثنا پولیس نے معاملے کی نسبت کیس درج کرکے تحقیقات شروع کی ہے۔