عہدہ سنبھالنے کے بعد شمالی کمان کے سربراہ کا ایل او سی کا پہلا دور ہ

سرینگر//
فوج کی شمالی کمان کے سربراہ لیفٹیننٹ جنرل سوچیندر کمار نے کور کمانڈر کے ہمراہ لائن آف کنٹرول پر اگلی چوکیوں کا دورہ کرکے آپریشنل تیاریوں کا جائزہ لیا۔
اس موقع پر انہیں آپریشنل صلاحیت میں اضافے کے بارے میں آگاہ کیا گیا۔
بتادیں کہ سوچیندر کمار نے۱۹فروری۲۰۲۴کو فوج کی شمالی کمان کا چارج سنبھالا جبکہ لیفٹیننٹ جنرل اوپیندرا دیودی کو کو وائس چیف آف آرمی سٹاف تعینات کیا گیا ہے ۔
دفاعی ترجما ن نے ایکس پر جانکاری فراہم کرتے ہوئے بتایا کہ فوج کی شمالی کمان کے سربراہ لیفٹیننٹ جنرل سوچیندر کمار نے ، ۱۵ویں کور کمانڈر اور جی او سی وجیرا ڈویژن کے ہمراہ ایل او سی کا دورہ کیا اور وہاں پر جوانوں سے گفت وشنید کی۔
لیفٹیننٹ جنرل کو بتایا گیا کہ ایل او سی میں اگلی چوکیوں پر تعینات فوجی جوان دن رات کڑی نظر گذر رکھے ہوئے ہیں تاکہ در اندازی کی کسی بھی کوشش کو ناکام بنا جا سکے ۔
ان کا کہنا تھا کہ ان علاقوں میں مشتبہ نقل وحمل دیکھتے ہی بڑے پیمانے پر تلاشی آپریشن شروع کئے جاتے ہیں۔
دفاعی ذرائع کا کہنا ہے کہ سرحدوں پر تعینات فوجی جوانوں کو چوکس رہنے کے احکامات صادر کئے گئے ہیں تاکہ ملک دشمن عناصر کے ناپاک ارادوں کو خاک میں ملایا جا سکے ۔انہوں نے مزید بتایا کہ لیفٹیننٹ جنرل نے ایل او سی پر تعینات افواج کو چوبیس گھنٹے متحرک رہنے کے احکامات صادر کئے ۔
کور کمانڈر نے شمالی کمان کے سربراہ کو ایل او سی کی تازہ ترین صورتحال کے بارے میں جانکاری فراہم کرتے ہوئے بتایا کہ ملک دشمن عناصر کے منصوبوں کو ناکام بنانے کی خاطر فوج اپنی خدمات خوش اسلوبی کے ساتھ انجام دے رہی ہیں۔
فوجی کمانڈر نے بتایا کہ شمالی کشمیر میں ایل او سی پرتعینات افواج کسی بھی چیلنج کا مقابلہ کرنے کیلئے تیارہے۔