وزیر اعظم کا ۳۲ہزار کروڑ روپے پروجیکٹوں کا افتتاح

جموں//
وزیر اعظم نریندر مودی نے منگل کے روز جموں وکشمیر میں۳۲ہزار کروڑ روپے سے زیادہ کی لاگت کے تعلیم، ہوا بازی اور سڑک جیسے شعبوں سمیت متعدد ترقیاتی پروجیکٹوں کا افتتاح کیا۔
مودی نے جموں سے ملک بھر کیلئے ساڑھے ۱۳ہزار کروڑ روپے کی مالیت کے پروجیکٹوں کا افتتاح کیا اور سنگ بنیاد بھی رکھا۔
وزیر اعظم نے جن پروجیکٹوں کا افتتاح کیا ان میں انڈین انسٹی ٹیوٹ آف ٹیکنالوجی (آئیآئی ٹیز)، انڈین انسٹی ٹیوٹ آف منیجمنٹ (آئی آئی ایمز) اور سینٹرل یونیورسٹیاں شامل ہیں۔
مودی نے جموں وکشمیر کے حال ہی میں بھرتی ہونے والے قریب۱۵سو ملازمین میں تقرری کے خطوط تقسیم کئے اور وکست بھارت، وکست جموں پروگرام کی مختلف اسکیموں کے تحت استفادہ کنندگان سے بات چیت بھی کی۔
وزیر اعظم نے جن ریل وے پروجیکٹوں کا افتتاح کیا ان میں بانہال، کھاری، سمبر، سنگلدان۴۸کلو میٹر لمبی ریلوے لائن اور بارہمولہ، سرینگر،بانہال ، سنگلدان سیکشن(۶۶ء۱۸۵کلو میٹر) برقی ریلوے لائن شامل ہے۔انہوں نے وادی کی پہلی برقی ریل اور سنگلدان اسٹیشن سے بارہمولہ اسٹیشن تک ریل سروس کا افتتاح کیا۔
مودی نے ملک کے تین نئے آئی آئی ایمز کا بھی افتتاح کیا جن میں آئی آئی ایم جموں، آئی آئی ایم بودھ گیا اور آئی آئی ایم وشاکھا پٹنم شامل ہیں علاوہ ازیں انہوں نے کیندریہ ودیالیوں کیلئے۲۰نئی عمارتوں اور ملک بھر میں جواہر نوودیا ودیالیوں کی۱۳نئی عمارتوں کا بھی افتتاح کیا۔
جموں وکشمیر کے لوگوں کو جامع طبی نگہداشت کی خدمات فراہم کرنے کیلئے انہوں نے آل انڈیا انسٹی ٹیوٹ آف میڈیکل سائنسز وجے پور سابنہ کا بھی افتتاح کیا۔
دیگر پروجیکٹوں کے علاوہ وزیر اعظم نے جموں ہوائی اڈے پر ایک نئی ٹرمینل عمارت کا سنگ بنیاد رکھا۔انہوں نے جموں کو کٹرہ سے جوڑنے والے۲۲ء۴۴کلو میٹر طویل دہلی ،امرتسر ،کٹرا ایکسپریس وے کے دوسرے اسٹریچ اور سرینگر رنگ روڈ کو فور لین کرنے کے دوسرے مرحلے سمیت کئی دوسرے اہم سڑک پروجیکٹوں کا سنگ بنیاد رکھا۔
وزیر اعظم نے جموں میں سی یو ایف (عام صارف کی سہولت) کے پٹرولیم ڈپو کو بھی تیار کرنے کے منصوبے کا سنگ بنیاد بھی رکھا۔