’ ہمارے دروازے ہر اس شخص کیلئے کھلے ہیں

سرینگر//
اپنی پارٹی کے صدر الطاف بخاری نے جمعرات کو کہا کہ ہمارے دروازے ہر اس شخص کیلئے کھلے ہیں جو جموں و کشمیر کو ہندوستان کا اٹوٹ حصہ مانتا ہے۔
بخاری نے سرینگر میں نامہ نگاروں کو بتایا کہ ہمارے دروازے ہر اس شخص کیلئے کھلے ہیں جو یہ سمجھتا ہے کہ جموں و کشمیر ہندوستان کا اٹوٹ حصہ ہے اور ملک کے آئین میں یقین رکھتا ہے۔
اپنی پارٹی کے صدر نے ان باتوں کا اظہار جمعرات کو یہاں نامہ نگاروں کے سوالوں کے جواب دینے کے دوران کیا۔
بخاری نے کہا’’لوگ جوق در جوق اپنی پارٹی میں شامل ہو رہے ہیں ۔ہمارے دروازے ان لوگوں کے کھلے ہیں جو جموں کشمیر کے ہندوستان کے ایک مضبوط حصہ ہونے کا یقین رکھتے ہیں‘‘۔
اپنی پارٹی کے صدرنے کہا’’یہ مسئلہ نہیں ہے آج کون پارٹی میں شامل ہوا ماضی میں وہ جماعت اسلامی یا حریت کے ساتھ وابستہ رہے ہوں گے لیکن میرے لئے وہ سب جموں وکشمیر کے باشندے ہیں‘‘۔
سری نگر ٹارگیٹ کلنگ واقعے کو شرمناک قرار دیتے ہوئے ان کا کہنا تھا کہ انتظامیہ کہیں نہ کہیں ان واقعات کو روکنے میں ناکام ہو رہی ہے ۔انہوں نے کہا کہ سرکار کو چاہئے کہ ملوثین کی نشاندہی کرکے ان کو قرار واقعی سزا دیں۔
پارلیمانی انتخابات کے بارے میں پوچھے جانے پر انہوں نے کہا کہ جموں وکشمیر میں اسمبلی انتخابات کا انعقاد ہمارے لئے اہم ہے کیونکہ اس کے ساتھ لوگوں او ر ہماری امیدیں وابستہ ہیں۔