نئی دہلی//) وزیر اعظم نریندر مودی اور متعدد بڑے لیڈروں اور تنظیموں نے سماجی انصاف اور مساوات کے علمبردار، بہار کے سابق وزیر اعلیٰ آنجہانی کرپوری ٹھاکر کو صد سالہ یوم پیدائش پر خراج عقیدت پیش کیا ہے ۔
مسٹر مودی نے جننائک کرپوری ٹھاکر کو ان کی صد سالہ پیدائش پر خراج عقیدت پیش کرتے ہوئے کہا، "ہماری حکومت کرپوری ٹھاکر کو بھارت رتن سے نوازنے کا اعزاز حاصل کررہی ہے "۔
حکومت نے منگل کو آنجہانی ٹھاکر کو ملک کے اعلیٰ ترین شہری اعزاز ‘بھارت رتن’ سے نوازنے کا اعلان کیا ہے ۔ مسٹر مودی نے سماج اور سیاست پر کرپوری ٹھاکر کے منفرد اثرات پر اپنے ایک مضمون میں اپنے خیالات کا اظہار کیا ہے ۔
آنجہانی کرپوری ٹھاکر کے بیٹے اور راجیہ سبھا کے رکن رام ناتھ ٹھاکر نے کہا کہ ان کے والد نے غریبوں کو انصاف فراہم کرنے کے لیے جدوجہد کی اور جیل بھی گئے ۔ انہوں نے اپنے والد کو بھارت رتن سے نوازنے پر حکومت کا شکریہ ادا کیا اور مبارکباد دی۔
جنتا دل (یو) کے ہزاروں کارکن پٹنہ کے ویٹرینری گراؤنڈ میں سابق وزیر اعلیٰ کی 100ویں سالگرہ منانے کے لیے جمع ہوئے تھے ۔
اس سے قبل کانگریس لیڈر راہل گاندھی نے عظیم لیڈر کرپوری ٹھاکر کو بھارت رتن سے نوازے جانے کا خیرمقدم کرتے ہوئے انہیں سماجی انصاف کا عظیم جنگجو قرار دیا اور آج ان کے صد سالہ یوم پیدائش پر انہیں خراج عقیدت پیش کیا۔ انہوں نے بہار کے پہلے غیر کانگریسی وزیر اعلیٰ کو بھارت رتن سے نوازنے کا بھی خیر مقدم کیا ہے ۔
مسٹر راہل گاندھی نے ایکس پر پوسٹ میں کہا، "میں جننائک کرپوری ٹھاکر جی کو خراج عقیدت پیش کرتا ہوں، جو سماجی انصاف کے سرخیل ہیں۔ وہ یقیناً ہندوستان کا ایک قیمتی گوہر ہیں اور انہیں بعد از مرگ بھارت رتن دینے کا فیصلہ خوش آئند ہے ۔
راجیہ سبھا کے ڈپٹی چیئرمین ہری ونش نارائن نے آنجہانی ٹھاکر کو بھارت رتن سے نوازنے کا خیرمقدم کیا ہے ۔
بہار کے نائب وزیر اعلیٰ تیجسوی یادو نے آنجہانی ٹھاکر کو صد سالہ یوم پیدائش کے موقع پر پٹنہ میں منعقدہ سرکاری تقریب میں ان کے قدآدم مجسمے پر پھول چڑھا کر خراج عقیدت پیش کیا۔
