جموں ڈویڑن میںادویات فروخت کرنے والے ۲۷ اداروں کی کارروائیاں معطل

جموں//
حقیقی اور معیاری ادویات / طبی مصنوعات کی دستیابی کو یقینی بنانے کیلئے متعلقہ بااختیار حکام کی نگرانی میں جموں صوبہ میں باقاعدگی سے ایک خصوصی مہم چلائی جارہی ہے۔ یہ مہم جموں کے ڈپٹی ڈرگ کنٹرولر محمد اقبال پلا کی نگرانی میں چلائی جارہی ہے۔ اس مہم کا بنیادی مقصد معیاری ادویات کی دستیابی کو یقینی بنانا اور ادویاتی فارمولیشنز کی غیر اخلاقی فروخت کو روکنا ہے۔
اس مہم کے دوران منشیات اور کاسمیٹکس ایکٹ ۱۹۴۰ کی دفعات اور اس کے تحت قواعد کی خلاف ورزی میں ملوث ہونے کی وجہ سے۲۷ ڈرگ سیل اداروں (جموں میں اٹھارہ) ، اودھم پور ، ریاسی اور راجوری اضلاع میں دو ، دو ، ڈوڈا ، کٹھوعہ اور کشتواڑ میں ایک ایک کو کام کرنے کی اجازت نہیں دی گئی۔
اس کے بعد لائسنس معطل کردیئے گئے اور نادہندگان کو متنبہ کیا گیا ہے کہ وہ کسی بھی غلط کام سے باز رہیں۔