شوپیاں میں پولیس نے دو سرگرمدہشت گردوں کو اشتہاری قرار دیا

سرینگر//
جموںکشمیر پولیس نے شوپیاں میں سرگرم دہشت گردوںکے خلاف سی آر پی سی کی سیکشن ۸۲کے تحت اشتہاری مجرم قراردیا ہے۔
معلوم ہوا ہے کہ دونوں سیکورٹی ایجنسیوں کو متعدد کیسوں میں مطلوب ہیں۔
پولیس کے ایک ترجمان نے بتایا کہ شوپیاں پولیس نے دو سرگرم دہشت گردوں جو کہ سیکورٹی ایجنسیوں کو کئی کیسوں میں مطلوب ہیں کے خلاف اعلانیہ حکم جاری کیا۔ انہوں نے سرگرم دہشت گردوںکی شناخت بلال احمد بٹ ولد غلام رسول بٹ ساکن چیک چھولان اور عابد رمضان شیخ ولد رمضان شیخ ساکن چھوٹی پورہ شوپیاں کے بطور کی ہے۔
ترجمان کے مطابق مذکورہ سرگرم دہشت گردوں کے خلاف پولیس اسٹیشنوں میںمقدمات درج ہیں۔
ایس ایس پی شوپیاں‘ تنو شیری نے اس ضمن میں تفصیلات فراہم کرتے ہوئے بتایا کہ ضلع شوپیاں میں امن و قانون کو برقرار رکھنے ، عوام الناس کی حفاظت کو یقینی بنانے کی خاطر پولیس پر عزم ہے۔
تنو شری نے کہاکہ دہشت گردوں کو انصاف کے کٹہرے میں کھڑا کرنے کی خاطر وہ دیگر ایجنسیوں کے ساتھ مل کر کام کر رہے ہیں۔ان کے مطابق این آئی اے عدالت کی جانب سے جاری کردہ سی آر پی سی کی دفعہ۸۲کے تحت اعلانیہ نوٹس سرگرم ملی ٹینٹوں کی رہاش گاہوں اور دیگر اہم مقامات پر چسپاں کئے گئے ہیں۔
معزز عدالت نے ملزمان کو عدالت یا تفتیشی ایجنسی یا پولیس کے سامنے ہتھیار ڈالنے کا موقع دیا ہے ، ایسا نہ کرنے کی صورت میں ان کے خلاف سیکشن ۸۳سی آر پی سی کے تحت کارروائی شروع کی جائے گی۔
پولیس ترجمان کے مطابق ایگزیکٹیو مجسٹریٹ شوپیاں ، حرمین اور متعلقہ سرپنچ ، لمبردار اور چوکیدار کی موجودگی میں نوٹسیں چسپاں کی گئیں۔
علاوہ ازیں شوپیاں پولیس نے عوام الناس سے اپیل کی ہے کہ اشتہاری قرار دئے گئے دہشت گردوں کے بارے میں قانون نافذ کرنے والے ادارے کے ساتھ اپنا دست تعاون فراہم کریں۔اعلانیہ کارروائی اور جائیداد کی قرقی دہشت گردی سے نمٹنے اور قانون کی حکمرانی کو برقرار رکھنے کی ایک جامع کوشش کا حصہ ہیں۔ ہم عوام سے گذارش کرتے ہیں کہ وہ چوکس رہیں اور ایسی معلومات کی اطلاع دیں جو ان سرگرم دہشت گردوں کو پکڑنے میں معاون ثابت ہوں۔