سی آر پی ایف کو جدید خصوصیات سے لیس نئی گاڑیاں ملیں

سرینگر//
اپنی آپریشنل صلاحیتوں کے مزید استحکام کے لئے سینٹرل ریزرو پولیس فورس(سی آر پی ایف) نے ہفتے کے روز کشمیر میں’وہیلڈ آرمرڈ ایمفیبیئس پلیٹ فارم‘ (ڈبیلو ایچ اے پی) گاڑیاں متعارف کیں جو زمینی و آبی دونوں جگہوں پر کارروائیاں انجام دینے کیلئے ڈیزائن کی گئی ہیں۔
اس مخصوص گاڑی کی نمائش جنوبی کشمیر کے ضلع پلوامہ کے لیتہ پورہ علاقے میں انجام دی گئی۔
اس موقع پر سی آر پی ایف کے سینئر افسر‘ شیش پال نے میڈیا کو بتایا کہ یہ ایک بکتر بند گاڑی ہے اور بھارت کی واحد گاڑی ہے جو پانی، سڑک اور دلدل تینوں جگہوں پر چلتی ہے ۔انہوں نے کہا کہ اس گاڑی کو ڈیفنس ریسرچ ایبڈ ڈیولوپمنٹ آرگنائزیشن اور ٹاٹا ایڈوانسڈ سسٹم لمیٹڈ کی لیبارٹری وہیکل ریسرچ ڈیولوپمنٹ ایسٹیبلشمنٹ میں تیار کیا گیا ہے ۔
ان کا کہنا تھا کہ اس گاڑی کا وزن ۲۴ٹن ہے اور اس کی لمبائی ۸میٹر جبکہ اس چوڑائی۳میٹر ہے ۔
پال نے کہا کہ یہ گاڑی دریا میں لہروں کے خلاف بھی چل سکتی ہے ۔انہوں نے کہا کہ یہ گاڑی کلی طور پر بلٹ پروف ا ور مائن پروٹیکٹڈ ہے ۔ان کا کہنا تھا کہ یہ گاڑی پانی میں۸سے۱۰کلو میٹر فی گھنٹہ کے رفتار سے چل سکتی ہے جبکہ نارمل راستوں پر یہ۱۴۰کلو میٹر فی گھنٹہ کے رفتار سے چل سکتی ہے ۔