شری امرناتھ یاترا:چھڑی مبارک دشنامی اکھاڑہ سے پوتر گھپا کیلئے روانہ

سرینگر//
شری امرناتھ جی یاترا کیلئے چھڑی مبارک (بھگوان شیو کی چاندی کی چھڑی) ہفتے کی صبح مہنت دیپندرا گری کی قیادت میں یہاں دشمانی اکھاڑے سے بم بم بولے نعروں کے بیچ پوتر گھپا کے لئے روانہ ہوئی۔ روانگی سے قبل چھڑی مبارک کی پوجا کی گئی جس میں سادھئوں کی ایک اچھی تعداد نے حصہ لیا۔
اس موقع پر چھڑی مبارک کے محافظ مہنت دیپندرا گری نے میڈیا کو بتایا کہ آج ہم یہاں دشنامی اکھاڑہ سے چھڑی مبارک کو لے کر پوتر گھپا کی یاترا کیلئے روانہ ہو رہے ہیں۔
گری نے کہا’’روانگی کے دوران سب سے پہلے یہاں سریشور مندر میں پوجا گی، پھر پانپور شیو مندر میں پوجا ہوگی، پھر بجبہاڑہ ، پھر مارٹنڈ میں اور پھر گنیش بل میں ندی کے پار گنیش مندر میں پوجا ہوگی اور بعد میں پہلگام میں رات کا قیام ہوگا‘‘۔
مہنت کا کہنا تھا کہ بعد ازاں۲۸؍اگست کو چند واڑی میں قیام ہوگا‘ پھر۲۹؍اگست کو شیش ناگ میں‘۳۰ ؍اگست جو چتر دیشی کا دن ہے اور اس بار رکشا بندھن کا تہوار ۳۰؍اگست کو ہی منایا جائے گا، کو پنچترنی میں قیام ہوگا اور ۳۱؍اگست کو سورج طلوع ہونے کے ساتھ ہی چھڑی مبارک کو پوتر گھپا پہنچایا جائے گا اور وہاں پوجا ہوگی‘‘۔
گری نے کہا کہ ۳۱؍اگست کو واپس چل کر پنچترنی میں قیام کیا جائے گا۔انہوں نے کہا کہ یکم ستمبر کو پنجترنی سے چل کر شیش ناگ اور چندن واڑی سے ہوتے ہی پہلگام میں رات کا قیام کیا جائے گا۔ان کا کہنا تھا کہ۲ ستمبر کو لدر ندی پہلگام کے کنارے پوجا ہوگی اور اسی کے ساتھ امسال کی چھڑی مبارک کی امرناتھ جی یاترا اختتام پذیر ہوگی۔
۶۲دنوںپر محیط یہ یاترا ۳۱؍اگست کو شرون پورنیما کے موقع پر اختتام پذیر ہوگی۔یاتریوں کی تعداد میں مسلسل کمی درج ہونے کے پیش نظر شری امرناتھ جی شرائن بورڈ (ایس اے ایس بی) نے جموں کے بھگوتی نگر بیس کیمپ سے پوتر گھپا تک یاترا متبادل دنوں چلانے کا فیصلہ لیا ہے ۔