رجنی پاٹل کی رکنیت بحال

نئی دہلی// صدرجمہوریہ کے خطاب پر شکریہ کی تحریک پر وزیر اعظم نریندر مودی کے ذریعہ جواب دئے جانے کے دوران اپوزیشن اراکین کے احتجاج کی ویڈیو سوشل میڈیا پر مبینہ طور پر پوسٹ کرنے کے الزام میں کانگریس کی معطل راجیہ سبھا رکن رجنی پاٹل کی رکنیت آج بحال کر دی گئی۔
صبح جب ایوان کی کارروائی شروع ہوئی تو قانون سازی کی کارروائی کو نمٹانے کے دوران ہی چیئرمین جگدیپ دھنکھڑ نے محترمہ سروج پانڈے سے استحقاق کمیٹی کی 74ویں رپورٹ کو ایوان کی میز پر رکھنے کے لئے کہا۔ محترمہ پانڈے نے کہا کہ کمیٹی نے محترمہ پاٹل کو مبینہ طور پر ایوان کی کارروائی کا ویڈیو بنانے اور اسے سوشل میڈیا پر پوسٹ کرنے کا قصوروار پایا ہے ۔ تاہم کمیٹی کا ماننا ہے کہ اس کے حوالے سے معطل کی گئیں محترمہ پاٹل کی سزا کومکمل سزا تصور کیا جائے اوران کی رکنیت آج سے ہی بحال کی جائے ۔
اس کے بعد چیئرمین نے محترمہ پاٹل کی رکنیت بحال کرنے کی تجویز ایوان میں پیش کی جسے صوتی ووٹ سے منظور کر لیا گیا۔ اس کے بعد مسٹر دھنکھڑ نے کہا کہ محترمہ پاٹل آج سے کارروائی میں حصہ لے سکتی ہیں۔