سرینگر میں۸محرم کا جلوس امن کی طرف ایک اور تاریخی سنگ میل ہے :پولیس

سرینگر//
جموںکشمیر پولیس کا کہنا ہے کہ۸محرم کے جلوس کی پر امن بر آمدگی جموں وکشمیر کے امن و استحکام کی طرف مارچ کا ایک اور تاریخی سنگ میل ہے ۔
ایک پولیس ترجمان نے اپنے ایک بیان میں کہا’’شیعہ برادری کے لوگ اس کو جموں و کشمیر کی تاریخ میں ایک تاریخی دن سے تعبیر کرتے ہیں جو ان دنوں کی عکاسی کرتا ہے جب یہاں حالات معمول پر تھے ‘‘۔
ترجمان نے کہا’’اس دن کی حساسیت کو مد نظر رکھتے ہوئے جب ملی ٹنسی کے سائے اور علیحدگی پسندوں کی سیاست نے اس طرح کی تقریبات کا انعقاد نا ممکن بنا دیا تھا، یہ جلوس۳۳برسوں کے بعد بر آمد کیا گیا‘‘۔
پولیس بیان میں کہا گیا’’آج جب زائد از تین دہائیوں کے بعد یہ جلوس بر آمد کیا گیا تو اس سے پر امن اور خوشحال مستقبل کیلئے ہمارا عزم ظاہر ہوجاتا ہے ‘‘۔
ترجمان نے کہا کہ یہ جلوس صبح۶ بجے شروع ہو کر دن کے۱۱بجے اختتام پذیر ہوا چہ جائیکہ جلوس کے لئے صرف دو گھنٹوں کا ہی وقت دیا گیا تھا۔
ترجمان نے کہا’’ہمارے اہلکار صبح چار بجے سے ہی تعینات تھے اور۵بجے ہی ناکہ پوائنٹس لگائے گئے تھے ‘‘۔
بیان میں کہا گیا کہ جلوس سے قبل ٹریفک نظام صبح سے ہی بہتر رہا۔انہوں نے کہا کہ اس جلوس میں انتہائی نظم و ضبط کا مظاہرہ کرتے ہوئے زائد از۲۵ہزار عزاداروں نے شرکت کی۔
پولیس بیان میں کہا گیا کہ یہ سچ مچ لوگوں کے لئے ایک تاریخی دن ہے ۔