’ضرورت پڑی تو ایل او سی پار کرسکتے ہیں‘

سرینگر//
وزیر دفاع‘ راج ناتھ سنگھ کا کہنا ہے کہ کسی میں ہمت نہیں کہ وہ بھارت کی طرف آنکھ اٹھا کر دیکھے کیونکہ ہمارے بہادر جوان سرحدوں کی حفاظت کر رہے ہیں۔
سنگھ نے کہا کہ ضرورت پڑنے پر وہ لائن آف کنٹرول عبور کرنے سے بھی نہیں ہچکچائیں گے جیسا کہ مسلح افواج کو بتا دیا گیا ہے ۔
وزیر دفاع کا کہنا تھا’’بھارت تمام ممالک کی بڑی عزت کرتا ہے اور بین الاقوامی طرز عمل کیلئے مقرر کردہ اصولوں پر بھی عمل کرتا ہے لیکن اس کی دریا دلی کو کمزوری نہیں سمجھا جا سکتا‘‘۔
سنگھ نے ان باتوں کا اظہار بدھ کو۲۴ویں کرگل وجے دیوس کے موقع پر دراس میں کرگل جنگ کی یادگار پر اپنے خطاب کے دوران کیا۔
وزیر دفاع نے کہا’’نریندر مودی قیادت والی حکومت بہت ہی واضح ہے اور ضرورت پڑنے پر سرحد پار آپریشن شروع کرنے کیلئے مسلح افواج کو کھلی چھوٹ دی ہے ‘‘۔
سنگھ کا کہنا تھا’’۱۹۹۹میں اگر ہم نے سرحد پار نہیں کی تو اس کا مطلب یہ نہیں ہے کہ ہم ایسے کرنے کی طاقت نہیں رکھتے تھے ، ہم ایسا کرسکتے تھے ، کرسکتے ہیں اور ضرورت پڑنے پر مستقبل میں ایسا کریں گے ‘‘۔
وزیر دفاع نے کہا’’میں ان بہادر فوجی جوانوں کو سلام پیش کرتا ہوں جنہوں نے مادر وطن کیلئے اپنا سب کچھ قربان کر دیا، میں ان بہادر بیٹوں کو سلام پیش کرتا ہوں جنہوں نے قوم کو ترجیح دے کر اس کیلئے اپنی زندگیاں نچھاور کرنے سے کوئی پس و پیش نہیں کیا‘‘۔
لوگوں کو یہ یقین دلاتے ہوئے کہ ملک محفوظ ہاتھوں میں ہے ، انہوں نے کہا’’ہم جانتے ہیں جب تک آپ (فوج) ہمارے سرحدوں کی حفاظت پر مامور ہیں تب تک کوئی ہماری طرف آنکھ اٹھا کر دیکھنے کی جرأت نہیں کر سکتا ہے ‘‘۔
وزیر دفاع کا کہنا تھا’’کرگل میں ہی نہیں بلکہ آزادی سے آپ کی بہادری کے کارناموں سے ملک کا سر فخر سے بلند ہے ‘‘۔
سنگھ نے کہا کہ کرگل جنگ بھارت پر مسلط کر دی گئی تھی۔انہوں نے کہا’’پاکستان نے ہماری پیٹھ میں چھرا گھونپا، بھارت پر جنگ مسلط کر دی گئی، میں اپنے بہادر بیٹوں کو سلام کرتا ہوں جنہوں نے ملک کو ترجیح دے کر اپنی زندگیاں قربان کیں‘‘۔
ان کا مزید کہنا تھا’’جب بھی کبھی جنگ کی صورتحال پیدا ہوتی ہے تو عوام فوج کی حمایت کرتی ہے میں لوگوں سے تاکید کرتا ہوں کہ وہ ایسی صورتحال میں فوج کی براہ راست حمایت کریں‘‘۔انہوں نے کہا کہ قوم کو اپنی فوج پر پورا بھروسہ ہے اور حکومت ملک کے وقار کے تحفظ کیلئے کسی بھی حد تک جانے کیلئے تیار ہے ۔
دریں اثنا چیف آف ڈیفنس اسٹاف جنرل انیل چوہان، آرمی چیف جنرل منوج پانڈے اور بحریہ کے سربراہ ایڈمرل آر ہری کمار نے بھی کرگل جنگ یاد گار پر پھولوں کی چادر چڑھا کر فوجی جوانوں کو شاندار خراج عقیدت پیش کیا۔
بتادیں کہ کرگل وجے دیوس پاکستان کے خلاف بھارت کی فتح کے یاد میں منایا جاتا ہے ۔