سابق چیف سیکریٹری بی آر شرماجموں کشمیر کے سٹیٹ الیکشن کمشنر مقرر

سرینگر//
جموں کشمیر لیفٹیننٹ گورنر منوج سنہا نے جمعہ کو سابق بیروکریٹ برج راج شرما کو اسٹیٹ الیکشن کمیشنر منتخب کیا ہے۔
اسٹیٹ الیکشن کمشنر جموں کشمیر میں پنچایتی اور ضلع ترقیاتی کونسل انتخابات منعقد کرتا ہے۔
شرما کے اسٹیٹ الیکشن کمشنر انتخاب کے متعلق منوج سنہا نے جمعہ کو ایک حکمنامہ جاری کرتے ہوئے کہا کہ ’’برج راج شرما ۶۵ برس کی عمر تک اسٹیٹ الیکشن کمشنر کا عہدہ سنبھالیں گے۔‘‘
سنہا نے حکمنامہ میں کہا ’’جموں وکشمیر پنچایتی راج ایکٹ ۱۹۸۹ کی شق۳۶ کے سب سیکشن۳ کے مطابق سابق آئی اے ایس افسر برج راج شرما کو اسٹیٹ الیکشن کمیشن منتخب کیا جا رہا ہے۔‘‘
شرما جموں ضلع کے رہنے والے ہیں اور۱۹۸۴بیچ کے آئی اے ایس افسر تھے اور اپریل سنہ ۲۰۲۰ میں نوکری سے سبکدوش ہوئے تھے۔ وہ جموں کشمیر میں کئی انتظامی عہدوں پر فائز رہ چکے ہیں اور ۲۰۱۵؍اور سنہ۲۰۱۷ کے مابین پی ڈی پی اور بی جے پی مخلوط سرکار میں جموں کشمیر کے چیف سیکریٹری رہے۔
سبکدوشی کے بعد اکتوبر۲۰۱۹میں ان کو مرکزی سرکار نے دو برس کے لئے اسٹاف سلیکشن کمیشن کا چیئرمین منتخب کیا تھا تاہم آٹھ ماہ کے بعد انہوں نے استعفیٰ پیش کیا کیونکہ سنہ مئی ۲۰۲۰ میں انکو جموں کشمیر کے سابق ایل جی گریش چند مرمو نے جموں کشمیر پبلک سروس کمیشن کا چیئرمین بنایا تھا، جس کی مدت دو برس ہے یا ۶۲ برس کی عمر کی حد۔
غور طلب ہے کہ جموں کشمیر میں اکتوبر نومبر سنہ۲۰۱۸ میں پنچایتی انتخابات کا انعقاد عمل میں لایا گیا تھا۔ ان انتخابات میں منتخب پنچایتی ممبران کی مدت امسال دسمبر میں مکمل ہو رہی ہے۔
سیاسی گلیاروں میں یہ چہ میگوئیاں کی جا رہی ہیں کہ جموں کشمیر میں پنچایتی و بلدیاتی انتخابات منعقد کئے جائیں گے۔
شرما سے قبل سابق آئی اے ایس افسر کے کے شرما اسٹیٹ الیکشن کمشنر رہے جن کی دو برس کی مدت امسال فروری میں مکمل ہوئی تھی۔ وہ ایل جی منوجی سنہا کے مشیر تھے تاہم اکتوبر سنہ۲۰۲۰ میں انکو سٹیٹ الیکشن کمشنر منتخب کیا گیا تھا۔ کے کے شرما کا تعلق بھی جموں ضلع سے ہے۔