نئی دہلی//مرکزی وزیر داخلہ امت شاہ نیشنل بینک فار ایگریکلچر اینڈ رورل ڈیولپمنٹ (نابارڈ) کے 42 ویں یوم تاسیس پر بدھ کو یہاں منعقد پروگرام میں مہمان خصوصی ہوں گے ۔
منگل کو نابارڈ کی طرف سے جاری کردہ ایک ریلیز کے مطابق پرگتی میدان کے بین الاقوامی نمائش کنونشن سینٹر میں منعقد ہونے والے اس پروگرام میں مرکزی وزیر مملکت برائے خزانہ بھاگوت کشن راؤ کراڈ، مرکزی داخلہ سکریٹری اجے کمار بھلا، کوآپریٹیو کی وزارت میں سکریٹری گیانش کمار، مالیاتی خدمات کے محکمے کے سکریٹری ڈاکٹر وویک جوشی اورحکومت ہند کی بین ریاستی کونسل کی سکریٹری انورادھا پرساد بھی شرکت کریں گی۔
ریلیز میں کہا گیا ہے کہ نابارڈ کوآپریٹیو کمیٹیوں کی ‘کوآپریٹو سے خوشحالی’ کے سفر میں مدد کرنے کے لیے پوری طرح تیار ہے ۔ پروگرام میں، مائیکرو اے ٹی ایم اور روپے کسان کریڈٹ کارڈز کے ذریعے دودھ کوآپریٹیو کمیٹیوں کے ڈیجیٹلائزیشن کے لیے پائلٹ پروجیکٹ کا باقاعدہ آغاز کرنے کی تیاریاں جاری ہیں۔ مختلف ریاستوں کے کوآپریٹو سیکٹر کے اہلکارپی اے سی ایس کمپیوٹرائزیشن اور دنیا کی سب سے بڑی اناج ذخیرہ کرنے کی اسکیم جیسے حکومت ہند کے دو فلیگ شپ پروگراموں کے لیے نابارڈ کے ساتھ مل کر کام کر رہے ہیں۔
پروگرام کے تحت ‘کلائمیٹ فنانس’ اور ‘ری امیجننگ کوآپریٹیو’ پر بات چیت کا بھی اہتمام کیا جائے گا۔ تقریب میں اعلیٰ سرکاری افسران، بینکرز، معروف کنسلٹنسی کمپنیاں اور دیگر اسٹیک ہولڈرز شرکت کریں گے ۔
