امن فوجیوں کی حفاظت کے لیے بین الاقوامی تعاون ضروری: راجناتھ

نئی دہلی// وزیر دفاع راج ناتھ سنگھ نے کہا ہے کہ متاثرہ علاقوں میں تعینات اقوام متحدہ کے امن فوجیوں کی حفاظت کے لیے بین الاقوامی سطح پر جدید اور زیادہ تعاون وقت کی ضرورت ہے ۔
منگل کو یہاں ہندوستانی فوج کی طرف سے اقوام متحدہ کے امن مشن کے 75 سال مکمل ہونے کے موقع پر منعقدہ ایک خصوصی سیمینار سے خطاب کرتے ہوئے مسٹر سنگھ نے اقوام متحدہ کے امن فوجیوں کی حفاظت اور ان کے مشن کی کامیابی کو یقینی بنانے کے لیے ذمہ دار اقوام کے تعاون پر زور دیا۔
امن فوجیوں کو درپیش نئے چیلنجوں پر روشنی ڈالتے ہوئے ، وزیر دفاع نے ان کی حفاظت اور اپنے مشن کی کامیابی کے لیے تربیت، ٹیکنالوجی اور وسائل میں زیادہ سرمایہ کاری کی ضرورت پر زور دیا۔ انہوں نے امن کی کارروائیوں میں خواتین کی بامعنی شرکت کی حمایت کی اور اس بات پر زور دیا کہ تنازعات سے متاثرہ علاقوں میں مشن کے دوران ان کی خصوصی شراکت کو بھی تسلیم کیا جانا چاہیے ۔
مسٹر سنگھ نے اقوام متحدہ کے فیصلہ ساز اداروں بشمول اقوام متحدہ کی سلامتی کونسل کو دنیا کی آبادیاتی حقیقتوں کے لیے زیادہ حساس بنانے کی ضرورت پر بھی زور دیا۔ انہوں نے کہا کہ جب دنیا کا سب سے زیادہ آبادی والا ملک ہندوستان سلامتی کونسل کے مستقل رکن کی حیثیت سے نشست حاصل کرنے سے قاصر ہے تو یہ اقوام متحدہ کے اخلاقی جواز کو مجروح کرتا ہے ۔ لہٰذا اب وقت آگیا ہے کہ اقوام متحدہ کے اداروں کو زیادہ جمہوری اور موجودہ حقائق کا نمائندہ بنایا جائے ۔
وزیر دفاع نے کہا کہ ہندوستان کے پاس اقوام متحدہ کے امن مشن میں شراکت کا ایک بھرپور ورثہ ہے اور وہ امن فوجیوں کا سب سے بڑا تعاون کرنے والا ملک ہے ۔ ہندوستان نے اب تک تقریباً 2.75 لاکھ فوجیوں کو امن کی کارروائیوں میں حصہ لینے کیلئے بھیجا ہے اور اس وقت اقوام متحدہ کے 12 مشنوں میں تقریباً 5,900 فوجی تعینات ہیں۔ 1950 میں کوریا میں اپنی پہلی مصروفیت کے بعد سے ، ہندوستانی فوجیوں نے پیچیدہ، بے لگام امن کی کارروائیوں میں حصہ لیا ہے ، اور اپنی پیشہ ورانہ مہارت کے لیے عالمی سطح پر تعریف حاصل کی ہے ۔
انہوں نے ان تمام ہندوستانیوں کا شکریہ ادا کیا جنہوں نے اقوام متحدہ کے امن دستوں کے طور پر خدمات انجام دی ہیں یا اس وقت خدمات انجام دے رہے ہیں۔ جناب سنگھ نے کہا، ‘‘ہمارے بہادر سپاہیوں، پولیس اہلکاروں اور شہری ماہرین نے امن قائم کرنے کے لیے غیر معمولی لگن اور غیر متزلزل عزم کا مظاہرہ کیا ہے ۔ انہوں نے انتہائی مشکل علاقوں اور سخت ترین ماحول میں بے لوث خدمت کی ہے ، امن قائم کرنے کے جذبے کو مجسم کیا ہے اور اقوام متحدہ کے چارٹر میں درج اصولوں کو برقرار رکھا ہے ۔ ان کی غیر متزلزل عزم، پیشہ ورانہ مہارت اور قربانی ہم سب کو متاثر کرتی ہے ۔”
مسٹر سنگھ نے ان خاندانوں سے تعزیت کا اظہار کیا جنہوں نے ڈیوٹی کے دوران اپنے قریبی عزیزوں کو کھو دیا اور انہیں سرکاری مدد کی پیشکش کی۔ انہوں نے امن پسندوں کی قربانیوں کو خراج عقیدت پیش کرنے پر زور دیا جو ایک زیادہ منصفانہ، پرامن اور جامع دنیا کی تعمیر کرتے ہیں۔ انہوں نے کہا، "آئیے ہم اقوام کے درمیان بات چیت، افہام و تفہیم اور تعاون کو فروغ دینے کے اپنے وعدوں کی تجدید کریں۔ ہم مل کر ایک ایسا مستقبل بنا سکتے ہیں جہاں ہر کوئی امن، ہم آہنگی اور وقار کے ساتھ رہ سکے ۔
آرمی چیف جنرل منوج پانڈے نے اقوام متحدہ کے امن مشن میں ہندوستان کے تعاون پر روشنی ڈالی۔ انہوں نے کہا کہ ہندوستان کے پاس دنیا بھر میں امن مشن کے مختلف آپریشنز میں خدمات انجام دینے والے تقریباً 5,900 امن دستے ہیں جن میں خواتین عملہ، افسران اور فوجی مبصرین، کانگو میں اقوام متحدہ کے ادارہ استحکام مشن میں خواتین ٹاسک فورس اور ابی کے لیے اقوام متحدہ کی عبوری سیکورٹی فورس شامل ہیں۔
مسٹر راج ناتھ نے اس موقع پر ہندوستان کے بھرپور اور قابل ذکر امن کیپنگ سفر کی ایک تصویری تحریر کی نقاب کشائی کی۔ اس کے علاوہ ملک کی امن فوج کی تاریخ پر روشنی ڈالنے والی تصویری نمائش کا بھی اہتمام کیا گیا۔ اقوام متحدہ میں ہندوستان کی مستقل نمائندہ روچیرا کمبوج نے ایک ویڈیو پیغام کے ذریعے تقریب سے خطاب کیا۔ چیف آف ڈیفنس اسٹاف جنرل انیل چوہان، ہندوستان کے لیے اقوام متحدہ کے ریذیڈنٹ کوآرڈینیٹر شومبے شارپ اور وزارت دفاع اور وزارت خارجہ کے سینئر حکام نے بھی اس تقریب میں شرکت کی۔