کرگل:گاڑی لڑھک گئی‘ خاتون ہلاک‘ کمسن لاپتہ‘پانچ دیگر زخمی

سرینگر//
کرگل کے کاکسار علاقے میں ایک آلٹو گاڑی ڈرائیور کے قابو سے باہر ہو کر لڑھک کر دریا میں جاگری جس کے نتیجے میں خاتون ہلاک‘پانچ دیگر زخمی ہوئے جبکہ کمسن بچہ لاپتہ ہو گیا جس کی بڑے پیمانے پر تلاش شروع کی گئی۔
اطلاعات کے مطابق کرگل کے کاکسار علاقے میں اس وقت سنسنی کا ماحول پھیل گیا جب عازمین حج کو وداع کرنے کے بعد واپسی پر ایک آلٹو گاڑی دریا میں جاگری۔
حادثے کی اطلاع ملتے ہی پولیس اور ایس ڈی آر ایف کی ٹیمیں جائے موقع پر پہنچی اور بچاؤ کارروائی شروع کی گئی جس دوران پانی سے ایک خاتون کی لاش برآمد کی گئی جبکہ پانچ دیگر زخمیوں کو طبی امداد کی خاطر نزدیکی ہسپتال منتقل کیا گیا۔
ذرائع نے بتایا کہ حادثے کے بعد ایک چار سالہ بچہ لاپتہ ہو گیا ہے جس کو تلاش کرنے کی خاطر ایس ڈی آر ایف کو کام پر لگا دیا گیا ہے۔
معلوم ہوا ہے کہ گاڑی میں ایک ہی کنبے کے سات افراد سوار تھے۔پولیس نے حادثے کی وجوہات جاننے کی خاطر کیس درج کرکے مزید تحقیقات شروع کی۔
اس دوران شمالی ضلع کپواڑہ میں منگل کے روز ایک کمسن بچی ٹرک سے گرنے کے باعث برسر موقع ہی از جان ہوئی۔
اطلاعات کے مطابق شمالی ضلع کپواڑہ کے زنگلی علاقے میں منگل کے روز کمسن بچی ٹرک سے گرنے کے باعث شدید طورپر زخمی ہوئی۔
معلوم ہوا ہے کہ زخمی بچی کو علاج ومعالجہ کی خاطر سب ضلع ہسپتال کپواڑہ پہنچایا گیا تاہم وہاں پر تعینات ڈاکٹروں نے اسے مردہ قرار دیا۔
بچی کی شناخت پانچ سالہ دیبا جان دختر غلام نبی خان ساکن زانگلی کپواڑہ کے بطور ہوئی ہے ۔
دریں اثنا سرینگر کے نوگام علاقے میں منگل کے روز پیش آئے ایک سڑک حادثے میں بانہال سے تعلق رکھنے والے شہری کی موت واقع ہوئی۔
ذرائع نے بتایا کہ نوگام ریلوے کراسنگ کے نزدیک نامعلوم گاڑی نے راہگیر کو زور دار ٹکر ماری جس وجہ سے وہ شدید طورپر زخمی ہوا ۔
معلوم ہوا ہے کہ آس پاس موجود لوگوں نے زخمی شہری کو ہسپتال پہنچایا تاہم وہ وہاں پر جانبر نہ ہو سکا۔
متوفی کی شناخت ایوب نائیک ساکن بانہال کے بطور ہوئی ہے ۔پولیس نے معاملے کی نسبت کیس درج کرکے مزید تحقیقات شروع کی۔