لندن//ہندوستانی ٹیم کے اسٹار بلے باز وراٹ کوہلی نے ورلڈ ٹیسٹ چیمپئن شپ (ڈبلیو ٹی سی) فائنل سے قبل کہا ہے کہ آسٹریلیا کی مہارت اور "مسابقتی رویہ” انہیں بہتر کھیلنے کی ترغیب دیتا ہے۔
کوہلی نے اسٹار اسپورٹس کے ساتھ بات چیت میں کہا، "میں (آسٹریلیا کی) ذہنیت کو اچھی طرح سمجھتا ہوں۔ اتنے مسابقتی لوگ، 11 میں سے 11 ایک ہی سمت میں سوچتے ہیں۔ وہ جانتے ہیں کہ میچ میں کیا ہو رہا ہے۔ انہیں جہاں موقع ملتا ہے اس کا فائدہ اٹھانے کے بارے میں سوچتے ہیں۔ ایسی ٹیم کے خلاف میری تحریک میں مزید اضافہ ہوجاتا ہے۔
انہوں نے کہا، ’’ایسی ٹیم جو اتنی مسابقتی ہے اورجس کی مہارت اتنی زیادہ ہے، ایسی ٹیم کے خلاف مجھے اپنے کھیل کی سطح کو بڑھانا ہی پڑتا ہے۔ اس ٹیم کی مہارت ایسی ہے کہ ایک بار آگے آنے پریہ آپ کو میچ میں واپس آنے کا موقع ہی نہیں دیں گے۔ اسی وجہ سے مجھے اپنا کھیل دوسری سطح پرلے جانا ہی پڑے گا۔
ہندوستان اور آسٹریلیا کے درمیان ڈبلیو ٹی سی فائنل بدھ کو یہاں اوول گراؤنڈ میں شروع ہوگا۔ کوہلی نے میچ سے قبل کہا کہ اوول میں بیٹنگ کرنا آسان نہیں ہوگا اور بلے بازوں کو محتاط رہنے کی ضرورت ہوگی۔
کوہلی نے کہا، "میرے خیال میں اوول چیلنجنگ ہو گا، ہمیں فلیٹ پچ نہیں ملے گی اور بلے بازوں کو محتاط رہنے کی ضرورت ہے۔ ہمیں اپنے نظم و ضبط پر توجہ مرکوز کرنی ہو گی۔ اس لیے آپ کو کنڈیشنز کے مطابق کھیلنے کا تجربہ ہونا چاہیے۔ ہم اس امید کے ساتھ نہیں جاسکتے کہ اوول کی پچ ہمیشہ کی طرح ہو گی۔”
ہندوستان نے اس سے قبل 2021 میں بھی ڈبلیو ٹی سی کے فائنل میں جگہ بنائی تھی، جہاں اسے نیوزی لینڈ سے شکست ہوئی تھی۔ اس بار جیتنے کی امید کرتے ہوئے، کوہلی نے کہا کہ جو بھی اوول کے حالات کے مطابق بہتر انداز میں ڈھال لے گا، وہ جیت جائے گا۔
انہوں نے کہا، ’’ہمیں حالات کے مطابق ڈھلنا ہوگا، ہمارے پاس صرف ایک میچ ہے اس لیے جو بھی حالات کے مطابق بہتر طورپر ڈھلے گا وہ میچ جیت جائے گا۔ یہی ورلڈ ٹیسٹ چیمپئن شپ کی خوبصورتی ہے۔ دو ٹیمیں جو گھریلو حالات میں میں نہیں ہیں۔ اس لیے یہ دیکھنا کافی دلچسپ ہوگا کہ دونوں ٹیمیں کس طرح سے صورتحال کو ایڈجسٹ کرتی ہیں۔”