بارہمولہ:۲غیر مقامی سمیت۴مطلوبہ منشیات فروش گرفتار

سرینگر/۲۹مئی
منشیات کے خلاف جنگ کو جاری رکھتے ہوئے پولیس نے بارہمولہ میں دو غیر مقامی سمیت ۴؍انتہائی مطلوب منشیات فروشوں کو گرفتار کرکے ان کی تحویل سے نشہ آور مواد بر آمد کیا ہے ۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ پولیس نے ڈی ایس پی ہیڈ کوارٹرس بارہمولہ سجاد بخاری کی نگرانی میں معمول کی گشت کے دوران کھیتن گن علاقے میں ایک انتہائی مطلوب منشیات فروش کو گرفتار کیا۔
پولیس ترجمان نے کہا کہ مذکورہ منشیات فروش کھیتن گن سے بارہمولہ کی طرف آرہا تھا اور پولیس کو دیکھتے ہی اس نے فرار ہونے کی کوشش کی تاہم اس کو موقع پر ہی دھر لیا گیا۔
بیان میں منشیات فروش کی شناخت شبیر احمد راتھر ولد غلام نبی راتھر ساکن کھیتن گن بارہمولہ کے بطور ہوئی ہے ۔
پولیس بیان کے مطابق تلاشی کے دوران اس کی تحویل سے۴۱۰گرام چرس جیسا مواد بر آمد کیا گیا جس کے بعد اس کو حراست میں لیا۔
پولیس ترجمان نے بتایا کہ پولیس نے کانسی پورہ بارہمولہ میں ناکہ چیکنگ کے دوران انتہائی مطلوب منشیات فروش شعیب اعجاز گورو ولد اعجاز احمد گورو ساکن کانسی پورہ کو گرفتار کیا۔
ترجمان نے کہا کہ یہ منشیات فروش سری نگر سے ایک بی ایم ڈبلیو گاڑی میں بارہمولہ کی طرف آ رہا تھا اور پولیس کو دیکھتے ہی اس نے فرار ہونے کی کوشش کی تاہم اس کو موقع پر ہی دھر لیا گیا۔
بیان میں کہا گیا کہ تلاشی کے دوران اس کی تحویل سے۱۶گرام برائون شوگر جیسا ممنوعہ مواد بر آمد کیا گیا جس کے بعد اس کو حراست میں لیا گیا اور گاڑی کو بھی ضبط کیا گیا۔
بیان کے مطابق اس سلسلے میں پولیس اسٹیشن بارہمولہ میں این ڈی پی ایس ایکٹ کے تحت ایک کیس درج کرکے مزید تحقیقات شروع کی گئی۔
پولیس ترجمان نے بتایا کہ پولیس نے منشیات فروشوں کے خلاف کارروائی کو انجام دیتے ہوئے فتح پوہ بارہمولہ میں دو غیر مقامی منشیات فروشوں کو گرفتار کیا۔
ترجمان نے کہا کہ پولیس نے معمول کی گشت کے دوران فتح پورہ میں دو منشیات فروشوں کو گرفتار کیا۔انہوں نے کہا کہ یہ منشیات فروش فتح پورہ سے بارہمولہ کی طرف آ رہے تھے گرچہ پولیس کو دیکھتے ہی انہوں نے فرار ہونے کی کوشش کی تاہم ان کو موقع پر ہی دھر لیا گیا۔
بیان میں گرفتار شدگان کی شناخت محمد ہمایوں شیخ ولد محمد نور حسین اور محمد جیوال مصطفیٰ ولد محمد سیف الدین ساکنان عطار دریا پور مغربی بنگال کے بطور کی گئی ہے ۔
بیان کے مطابق تلاشی کے دوران رفتار شدگان کی تحویل سے۲۰گرام برائون شوگر جیسا ممنوعہ مواد بر آمد کیا گیا۔
پولیس نے اس سلسلے میں پولسی اسٹیشن بارہمولہ میں این ڈی پی ایس ایکٹ کے تحت ایک کیس درج کرکے مزید تحقیقات شروع کی ہیں۔