سرینگر//
جنوبی کشمیر کے اونتی پورہ کے برسو علاقے میں جمعرات کی صبح ایک دلدوز سڑک حادثے میں۲غیر مقامی افراد از جان جبکہ ۹دیگر زخمی ہوگئے ۔
ذرائع نے بتایا کہ اونتی پورہ میں گوری پورہ برج کے نزدیک جموں سے سرینگر آ رہا ایک ٹیمپو قومی شاہراہ پر حادثے کا شکار ہوگیا۔
اس حادثے میں۲؍افراد کی برسر موقع ہی موت واقع ہوگئی جبکہ ۹دیگر زخمی ہوگئے جنہیں علاج و معالجے کے لئے پی ایچ سی اونتی پورہ پہنچایا گیا۔
متوفین کی شناخت لکشمن دمکا ساکن جھار کھنڈ اور سمن دیوی چٹر پوری ساکن مدھیہ پردیش کے بطور ہوئی ہے ۔دریں اثنا پولیس نے اس ضمن میں ایک کیس درج کرکے تحقیقات شروع کی ہیں۔
اس دوران راجوری ضلع کے کوٹرناکہ علاقے میں جمعرات کی صبح ایک گاڑ ی کو حادثہ پیش آیا جس کے نتیجے میں نو مسافر زخمی ہوئے ۔
اطلاعات کے مطابق جمعرات کی صبح راجوری کے کوٹر ناکہ علاقے میں اس وقت سنسنی کا ماحول پھیل گیا جب مسافر بردار گاڑی ڈرائیور کے قابو سے باہر ہو کر الٹ گئی۔
معلوم ہوا ہے کہ آ س پاس موجود لوگوں نے زخمیوں کو طبی امداد کی خاطر نزدیکی ہسپتال پہنچایا۔پولیس نے اس ضمن میں کیس درج کرکے مزید تحقیقات شروع کی۔