سپریم کورٹ نے مغربی بنگال میں ‘دی کیرالہ اسٹوری’ پر پابندی ہٹایا

نئی دہلی// سپریم کورٹ نے جمعرات کو مغربی بنگال حکومت کے 8 مئی کو فلم ‘دی کیرالہ اسٹوری’ کی نمائش پر پابندی لگانے کے حکم پر روک لگا دی۔
چیف جسٹس ڈی وائی چندر چوڑ اور جسٹس پی ایس۔ نرسمہا اور جسٹس جے ۔ بی۔ پارڈی والا نے ریاستی حکومت کے حکم پر یہ کہتے ہوئے روک لگا دی کہ اس پر پابندی لگانے کے لیے کوئی خاطر خواہ بنیاد نہیں ہے ۔
بنچ نے مغربی بنگال حکومت سے کہاکہ "ملک میں ہر جگہ فلم چل رہی ہے ۔ آپ پوری ریاست میں فلم پر پابندی نہیں لگا سکتے ۔”
عدالت عظمیٰ نے تمل ناڈو حکومت کو بھی ہدایت دی کہ وہ فلم کی نمائش کو روکنے کے لیے کوئی قدم نہ اٹھائے اور فلم دیکھنے والوں کی حفاظت کو یقینی بنانے کے لیے ہر سنیما ہال کو مناسب سیکیورٹی فراہم کرے ۔
سپریم کورٹ نے فلم کے پروڈیوسر سن شائن پکچرز پرائیویٹ لمیٹڈ کی طرف سے پیش ہونے والے سینئر وکیل ہریش سالوے کا ایک بیان بھی ریکارڈ کیا کہ کسی بھی تنازعہ کو ختم کرنے کے لیے 20 مئی کی شام 5 بجے تک فلم میں ڈس کلیمر ڈال دیا جائے گا کہ 32,000 کوئی مستند اعداد و شمار نہیں ہیں اور فلم ایک فرضی کہانی پر مبنی ہے ۔
بنچ نے یہ فیصلہ کرنے کے لیے فلم ‘دی کیرالہ اسٹوری’ دیکھنے کا بھی فیصلہ کیا کہ آیا یہ قابل قبول ہے یا نہیں۔
سپریم کورٹ نے کہا کہ وہ گرمیوں کی چھٹیوں کے بعد مدراس اور کیرالہ ہائی کورٹ کے فیصلوں سے پیدا ہونے والی عرضیوں پر غور کرے گی۔ ان ہائی کورٹس نے اس فلم کی ریلیز پر روک لگانے کی درخواست کو خارج کر دیا تھا۔