کشمیر:۲۰ سے۲۲؍اپریل تک درمیانے درجے کی بارشوں کی پیش گوئی

سرینگر/۱۷؍اپریل
وادی کشمیر میں موسم میں بہتری واقع ہونے کے ساتھ ہی شبانہ درجہ حرارت ایک بار پھر معمول سے زیادہ درج ہوا ہے ۔
ادھر محکمہ موسمیات نے وادی میں بارشوں کے ایک اور مرحلے کی پیش گوئی کی ہے ۔متعلقہ محکمے کے ایک ترجمان نے کہا کہ مغربی ہواوں کی ایک اور لہر جموں وکشمیر اور لداخ یونین ٹریٹریوں میں۱۹؍اپریل کو داخل ہو سکتی ہے ۔انہوں نے کہا کہ اس کے نتیجے میں وادی کشمیر میں۲۰سے۲۲؍اپریل تک درمیانی درجے سے لے کر بھاری بارشیں متوقع ہیں۔انہوں نے کہا کہ وادی میں موسم بہتر ہونے کے ساتھ ہی پہلگام کو چھوڑ کے شبانہ درجہ حرارت ایک بار پھر معمول سے زیادہ درج ہونے لگا ہے ۔
بتادیں کہ وادی میں گذشتہ شب کئی ہفتوں کے بعد شبانہ درجہ حرارت معمول سے نیچے ریکارڈ ہوا تھا۔
سری نگر میں کم سے کم درجہ حرارت۶ء۹ڈگری سینٹی گریڈ ریکارڈ کیا گیا ۔وادی کے مشہور زمانہ سیاحتی مقام گلمرگ میں کم سے کم درجہ حرارت۰ء۵ڈگری سینٹی گریڈ ریکارڈ کیا گیا۔وادی کے دوسرے مشہور سیاحتی مقام پہلگام میں کم سے کم درجہ حرارت۳ء۳ڈگری سینٹی گریڈ ریکارڈ ہوا۔
دریں اثنا وادی میں ہفتے کو صبح سے ہی سے ہی موسم خشک و خوشگوار رہا۔ماہرین موسمیات کے مطابق جموں وکشمیر میں امسال ماہ مارچ میں بارش کی۸۰فیصد کمی درج ہوئی ہے ۔دارلحکومت سری نگر میں ماہ مارچ میں مجموعی طور پر۳ء۲۱بارش ریکارڈ کی گئی جو معمول کے مطابق۶ء۱۷۷ملی میٹر ریکارڈ ہونی چاہئے تھی۔
اسی طرح سرمائی دارلحکومت جموں میں ماہ مارچ میں مجموعی طور پر ملی میٹر بارش ریکارڈ ہوئی جو معمول کے مطابق ۶۸ملی میٹر درج ہونی چاہئے تھی۔